Афғонистонда гуманитар ёрдамга муҳтож болалар сони 13 миллиондан ошиб кетди

Афғонистонда 13,1 миллион бола гуманитар ёрдамга муҳтож. Сўнгги уч ой ичида мамлакатда ёрдамга муҳтож болалар сони 3,1 миллионга ошган. Бу ҳақда Save the Children халқаро ташкилотига таяниб, The Guardian хабар берди.

Ташкилот вакили Мет Тинклер Афғонистондаги инқирозли вазиятни «дўзахнинг ўзи» деб изоҳлаган.

Тинклернинг айтишича, 22,8 миллион афғонистонлик «очлик ёқасида» (Афғонистон аҳолиси 38 миллион кишига тенг). Халқаро ташкилот вакилининг сўзларига кўра, 2022 йил ўрталарига бориб, мамлакат аҳолисининг 95 фоизи камбағаллик ёқасига бориб қолади.

2021 йилнинг декабрь бошида Save the Children Афғонистондаги 780 мингга яқин бола қишда яшаш учун нормал бошпанага эга эмаслигидан огоҳлантирганди.

Афғонистонда «Толибон» ҳокимият тепасига келгач, кўплаб афғон спортчилари қўллаб-қувватлаш ва маблағ етишмаслиги сабабли фаолиятини якунлашга мажбур бўлган. Афғонистон айни пайтда жиддий гуманитар инқирозга юз тутмоқда. Мамлакатда миллионлаб одамлар очлик ёқасида, озиқ-овқат, дори-дармон ва бошқа зарур маҳсулотлар етишмовчилиги ҳукм сурмоқда.

26 январь куни БМТ бош котиби Антониу Гутерриш халқаро ҳамжамиятни Афғонистонни фалокатдан қутқариш учун мамлакатга гуманитар ёрдамларни кўтаришга чақирган эди. Гутерриш миллионлаб афғонлар очликдан азият чекаётгани, таълим ва соғлиқни сақлаш тизимлари барбод бўлиш арафасида тургани учун «қутқарув» операцияларини чекловчи ҳар қандай қоида ва шартлар тўхтатилиши кераклигини таъкидлаганди.

БМТнинг гуманитар масалаларни мувофиқлаштириш бошқармаси 2022 йил январига қадар Афғонистонда давом этаётган гуманитар инқирозни ҳал этиш учун 1,5 миллиард долларга яқин маблағ тўплаган. Ушбу маблағлар қисман афғонларни қишга тайёрлаш, жумладан, нақд пул ва ноозиқ-овқат маҳсулотларини тўғридан-тўғри тақсимлашни қўллаб-қувватлаш учун сарфланган.

Аввалроқ Ўзбекистоннинг Афғонистонга юборган инсонпарварлик ёрдамини топшириш маросими бўлиб ўтгани, Хитой Афғонистонга 800 минг доза вакцина етказиб бергани, Жаҳон банки Афғонистонни қўллаб-қувватлаш учун 280 млн доллар маблағ ажратиши тўғрисида хабар берилганди.