AQSh prezidenti Jo Bayden fransiyalik hamkasbi Emmanuel Makron bilan telefon orqali suhbat chog‘ida Ukraina atrofidagi vaziyatni muhokama qildi. Bu haqda Oq uy saytida xabar berildi.
“Prezident kichik Jozef Bayden bugun (2-fevral) Fransiya prezidenti Emmanuel Makron bilan Ukraina chegaralarida to‘planishda davom etayotgan Rossiya qo‘shinlari haqida gaplashdi”, — deyiladi Oq uy press-relizida.
Har ikki yetakchi Ukraina suvereniteti va hududiy yaxlitligini qo‘llab-quvvatlashini yana bir bor tasdiqladi. Ular diplomatik aloqalar va Ukraina atrofidagi vaziyat yomonlashsa, Rossiya uchun “tez va og‘ir iqtisodiy chiqimlar” tayyorlashni muhokama qildi, deya qo‘shimcha qilgan Oq uy.
“Prezident Bayden va prezident Makron yaqindan muloqotda bo‘lib turishga jumladan, NATOdagi ittifoqchilari va Yevropa Ittifoqidagi hamkorlari bilan maslahatlashuvlar o‘tkazishga kelishib oldi, ”, — deyiladi press-relizda.
Kiyev va G‘arb davlatlari so‘nggi paytlarda Ukraina chegaralari yaqinida Rossiyaning “tajovuzkor harakatlari” kuchayganidan xavotirda. Moskva bu kabi ayblovlarni bir necha bor rad etib, hech kimga tahdid qilmasligini va biror davlatga hujum qilish niyatida emasligini aytmoqda. Moskvaning fikricha, “Rossiya agressiyasi” haqidagi da’volardan Rossiya chegaralari yaqinida NATOning ko‘proq harbiy texnikasini joylashtirish uchun bahona sifatida foydalanilmoqda.
Avvalroq Buyuk Britaniya bosh vaziri Boris Jonson Kiyevga tashrif buyurib, Ukraina prezidenti Vladimir Zelenskiy bilan muzokaralar o‘tkazgandi. Jonson “rossiyalik askarning oyog‘i Ukraina chegarasini kesib o‘tgan daqiqada” Britaniya Rossiyaga qarshi sanksiyalar qo‘llashiga va’da bergan.
Izoh (0)