Ta’mirlash ishlari tufayli 2-fevral kuni Toshkent shahrining Uchtepa, Yangihayot, Sergeli tumanlarining ayrim joylarida tabiiy gaz ta’minoti vaqtincha to‘xtatiladi. Bu haqda “Hududgaz poytaxt” xabar qildi.
Qayd etilishicha, Uchtepa tumani Algoritm mavzesida joylashgan yerusti quvurini harakatdagi gaz quvuriga ulash ishlari rejalashtirilgan. Shu sababli 2-fevral kuni soat 11:00 dan 16:00 gacha ushbu manzildagi 50 ta aholi xonadonida hamda 1 ta ulgurji iste’molchida tabiiy gaz ta’minoti vaqtincha to‘xtatiladi.
Shuningdek, Yangihayot tumani Uzar ko‘chasida joylashgan yer osti o‘rta bosimli quvurini harakatdagi gaz quvuriga ulash ishlari rejalashtirilgan. Shu tufayli 2-fevral kuni soat 11:00 dan 17:00 gacha Uzar ko‘chasidagi 45 ta ko’p qavatli uydagi 2520 ta xonadonda hamda 4 ta ulgurji iste’molchida tabiiy gaz ta’minoti vaqtincha to‘xtatiladi.
Sergeli tumani “Daryo bo‘yi” mahallasidan o‘tgan o‘rta va past bosimli gaz quvurlarida aniqlangan gaz sizib chiqish holatini bartaraf etish ishlari “Sergelitumangaz” gaz ta’minoti bo‘limi tomonidan rejalashtirilgan. 2-fevral kuni soat 11:00 dan 17:00 gacha ushbu mahalladagi 1199 ta xonadonda hamda 115 ta ulgurji iste’molchida tabiiy gaz ta’minoti vaqtincha to‘xtatiladi.
“Ta’mirlash ishlari tugatilgandan so‘ng tabiiy gaz qayta tiklanadi. Yetkazilayotgan noqulayliklar uchun tabiiy gaz iste’molchilaridan uzr so‘raymiz”, — deyiladi xabarda.
Eslatib o‘tamiz, 25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Buning ortidan tabiiy gaz yetkazib berilishida ham uzilishlar kuzatildi. 27-yanvarga kelib Toshkentning 6 ta tumanida, 28-yanvarda butun mamlakatda gaz ta’minoti to‘liq tiklandi.
“Hududgaz poytaxt” ma’lumotlariga ko‘ra, 28-yanvar kuni soat 11:00 dan 16:00 ga qadar ta’mirlash ishlari olib borilishi tufayli Yunusobod va Olmazor tumanlarining ikkita mahallasida tabiiy gaz ta’minoti vaqtincha to‘xtatilgan.
2022-yil 31-yanvar kuni soat 09:00 dan 18:00 gacha Toshkent viloyati Zangiota tumanida, Toshkent shahri Sergeli tumanida hamda Bektemir va Mirobod tumanlari kesishmasidagi Baratxo‘ja, Qo‘yliq ovul, Badaxshon ko‘chalaridagi aholi xonadonlarida hamda ulgurji iste’molchilarida tabiiy gaz ta’minoti vaqtincha to‘xtatilgandi.
Izoh (0)