Rustam Pardayev 31-yanvar kuni bo‘lib o‘tgan Xalq deputatlari Qiziriq tumani Kengashining navbatdan tashqari qirq to‘rtinchi sessiyasida Qiziriq tuman hokimi etib tayinlandi. Bu haqda Surxondaryo viloyati hokimligi xabar qildi.
Qayd etilishicha, sessiya ishida Surxondaryo viloyati hokimi To‘ra Bobolov ishtirok etgan. Unda tumanning barcha sohalardagi ko‘rsatkichlari yaxshi emasligi, aholiga qulay sharoitlar yaratish borasida yetarli darajada ish olib borilmayotgani hamda kelgusida bajarilishi lozim bo‘lgan ishlar haqida so‘z yuritilgan.
Sessiyada tashkiliy masala ko‘rilib, Ilhom Yusupov tuman hokimi vazifasidan ozod qilingan. Denov tumani hokimi lavozimida faoliyat yuritib kelayotgan Rustam Pardayev Qiziriq tumani hokimi etib tasdiqlangan.
Rustam Pardayev 1979-yil 7-aprelda Qiziriq tumanida tug‘ilgan. 2006-yil Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi — iqtisodchi.
Mehnat faoliyati davomida AT “Mikrokreditbank” Jarqo‘rg‘on filiali boshqaruvchisi va viloyat filiali, viloyat iqtisodiyot va hududlarni kompleks rivojlantirish bosh boshqarmasi, investitsiyalar bosh boshqarmasi, investitsiyalar va tashqi savdo boshqarmasi boshlig‘i, viloyat hokimining moliya-iqtisodiyot va tadbirkorlik masalalari bo‘yicha birinchi o‘rinbosari, 2020-yildan to shu kungacha Denov tumani hokimi lavozimida ishlagan. Undan so‘ng Denov tuman hokimi lavozimiga Abdumalik Allamuradov tasdiqlandi.
Ma’lumot uchun, Ilhom Yusupov 2020-yilning 11-iyul kunidan Qiziriq tumani hokimi lavozimida ishlab kelayotgan edi.
2021-yil dekabr oyida To‘ra Bobolov videoselektorda bir qator amaldorlarga intizomiy jazo choralarini qo‘llagan. Jumladan, Qiziriq tumani hokimi vazifasida ishlagan Ilhom Yusupovga o‘rtacha oylik ish haqining 30 foizi miqdorida jarima jazosi belgilangan.
Izoh (0)