Рустам Пардаев 31 январь куни бўлиб ўтган Халқ депутатлари Қизириқ тумани Кенгашининг навбатдан ташқари қирқ тўртинчи сессиясида Қизириқ туман ҳокими этиб тайинланди. Бу ҳақда Сурхондарё вилояти ҳокимлиги хабар қилди.
Қайд этилишича, сессия ишида Сурхондарё вилояти ҳокими Тўра Боболов иштирок этган. Унда туманнинг барча соҳалардаги кўрсаткичлари яхши эмаслиги, аҳолига қулай шароитлар яратиш борасида етарли даражада иш олиб борилмаётгани ҳамда келгусида бажарилиши лозим бўлган ишлар ҳақида сўз юритилган.
Сессияда ташкилий масала кўрилиб, Илҳом Юсупов туман ҳокими вазифасидан озод қилинган. Денов тумани ҳокими лавозимида фаолият юритиб келаётган Рустам Пардаев Қизириқ тумани ҳокими этиб тасдиқланган.
Рустам Пардаев 1979 йил 7 апрелда Қизириқ туманида туғилган. 2006 йил Тошкент давлат иқтисодиёт университетини тамомлаган. Маълумоти бўйича мутахассислиги — иқтисодчи.
Меҳнат фаолияти давомида АТ «Микрокредитбанк» Жарқўрғон филиали бошқарувчиси ва вилоят филиали, вилоят иқтисодиёт ва ҳудудларни комплекс ривожлантириш бош бошқармаси, инвестициялар бош бошқармаси, инвестициялар ва ташқи савдо бошқармаси бошлиғи, вилоят ҳокимининг молия-иқтисодиёт ва тадбиркорлик масалалари бўйича биринчи ўринбосари, 2020 йилдан то шу кунгача Денов тумани ҳокими лавозимида ишлаган. Ундан сўнг Денов туман ҳокими лавозимига Абдумалик Алламурадов тасдиқланди.
Маълумот учун, Илҳом Юсупов 2020 йилнинг 11 июль кунидан Қизириқ тумани ҳокими лавозимида ишлаб келаётган эди.
2021 йил декабрь ойида Тўра Боболов видеоселекторда бир қатор амалдорларга интизомий жазо чораларини қўллаган. Жумладан, Қизириқ тумани ҳокими вазифасида ишлаган Илҳом Юсуповга ўртача ойлик иш ҳақининг 30 фоизи миқдорида жарима жазоси белгиланган.
Изоҳ (0)