Kattaqo‘rg‘onda soliqchining o‘limida aybdor deb topilgan YPX inspektorlariga tayinlangan hukm o‘zgarishsiz qoldirildi

Kattaqo‘rg‘onda soliqchining o‘limida aybdor deb topilgan YPX inspektorlari ozodlikdan mahrum qilingani haqida xabar berilgandi. 31-yanvar kuni hukm yuzasidan keltirilgan apellyatsiya shikoyati ko‘rib chiqildi.

Ma’lumot uchun, 2021-yil 3-dekabr kuni jinoyat ishlari bo‘yicha Qo‘shrabot tuman sudining sudlanuvchilar Mehriddin Kuchkarov (1987-yilda Samarqand viloyatida tug‘ilgan, Kattaqo‘rg‘on tumani IIB yo‘l harakati xavfsizligi bo‘linmasi boshlig‘i lavozimida ishlagan) va Shahboz Rahimberdiyev (1990-yilda Samarqand viloyatida tug‘ilgan, Samarqand viloyati IIB YHXB YPXB 4-otryad katta inspektori lavozimida ishlagan)ga oid jinoyat ishi yuzasidan hukmi e’lon qilinib, ularga nisbatan 2 yil 10 oy muddatga ozodlikdan mahrum qilish jazosi tayinlangandi.

Ma’lum qilinishicha, 2022-yil 31-yanvar kuni Samarqand viloyat sudining jinoyat ishlari bo‘yicha sudlov hay’atida ushbu jinoyat ishi bo‘yicha sudlanuvchi Mehriddin Kuchkarov va uning himoyachisi – advokat Sh.Mahammadiyev hamda jabrlanuvchi I.Jamolov tomonidan keltirilgan apellyatsiya shikoyatlarini ko‘rib chiqish bo‘yicha sud jarayoni nihoyasiga yetib, apellyatsiya instansiyasining ajrimi qabul qilindi.

Unga ko‘ra Mehriddin Kuchkarov va Shahboz Rahimberdiyev o‘z mansab vakolatlaridan chetga chiqishi va belgilanmagan tartibda harakat qilishlari natijasida ehtiyotsizlikdan A.Ahmedovning o‘limiga sababchi bo‘lgani holati sudlov hay’ati majlisida so‘ralgan sud-tibbiy eksperti va guvohlarning ko‘rsatuvlari hamda jinoyat ishida mavjud sud-tibbiy ekspertiza xulosasi, murdani, avtomashinani va hodisa joyini ko‘zdan kechirish bayonnomasi, bodikamerasi yordamida yozib olingan videoyozuvlar va ularning stenogrammasi, xizmat tekshiruvi xulosalari, tushuntirish xatlari va boshqa inkor qilib bo‘lmaydigan dalillar bilan o‘z tasdig‘ini topgani sababli jinoyat ishlari bo‘yicha Qo‘shrabot tuman sudining 2021-yil 3-dekabrdagi sudining hukmi o‘zgarishsiz, keltirilgan apellyatsiya shikoyatlari qanoatlantirilmasdan qoldirildi.

Mazkur ajrimdan norozi taraflar qonunchilikda belgilangan tartib va muddatda Oliy sudning Jinoyat ishlari bo‘yicha sudlov hay’atiga kassatsiya shikoyati (protest) keltirishga haqli ekani ma’lum qilingan.

Voqea tafsiloti

Soat 00:20 larda chorrahaning qarama-qarshi yo‘nalishi bo‘yicha harakatlanib kelgan fuqaro Azizbek Ahmedov o‘zining boshqaruvidagi Cobalt rusumli avtomashinasini chorrahadagi svetoforning harakatni taqiqlovchi qizil chirog‘idan harakatni davom ettirib ketganligini ko‘rgan. Ushbu avtomashina haydovchisini to‘xtatish maqsadida uning orqasidan harakatni davom ettirib, unga yetib olishgach, o‘zlarining boshqaruvidagi Spark rusumli avtomashina bilan Azizbek Ahmedov boshqaruvidagi Cobalt rusumli avtomashinaning old tomoniga o‘tib, uning harakatlanishini cheklab to‘xtatgan.

Keyinchalik Cobalt rusumli avtomashina haydovchisi Azizbek Ahmedovning nutqi va harakatlaridan uning mast holatdaligini bilishgach, Kattaqo‘rg‘on tuman IIB YHXB bo‘linmasi boshlig‘i Mehriddin Kuchkarov haydovchi Azizbek Ahmedovga tibbiy ko‘rikdan o‘tishni taklif qilgan.

Shunda u tibbiy ko‘rikdan o‘tishdan bosh tortgach, Mehriddin Kuchkarov va Shahboz Rahimberdiyev Vazirlar Mahkamasining 2018-yil 1-dekabrdagi 975-sonli qarori bilan tasdiqlangan “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi nizomning 14-bandi, 7-xatboshisida nazarda tutilgan “haydovchi mastligi yoki mast emasligini aniqlash uchun tekshiruv o‘tkazilishidan bo‘yin tovlagan taqdirda Ma’muriy javobgarlik to‘g‘risidagi kodeksining 136-moddasida (transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi) nazarda tutilgan huquqbuzarlik uchun ma’muriy bayonnoma rasmiylashtirish choralarini ko‘rmasdan, “Ichki ishlar organlari to‘g‘risida”gi qonunning 22-moddasi talablariga zid ravishda, mansabdor shaxs sifatida o‘ziga berilgan vakolatlar doirasidan chetga chiqqan.

Ular harakatlari bilan o‘ziga va atrofdagilarga ziyon yetkazishga harakat qilmagan bo‘lsa-da, haydovchi Azizbek Ahmedovga asossiz hamda maqsadga muvofiq bo‘lmagan tarzda kuch ishlatib, uni o‘zlari minib kelgan Spark rusumli avtomashinaning orqa o‘rindig‘iga majburlab joylashtirishga harakat qilgan.

Ushbu jarayonda Azizbek Ahmedov o‘ziga nisbatan kuch ishlatmaslikni va unga nisbatan qilinayotgan zo‘ravonlikdan azob chekayotganligini bildirib, buni to‘xtatishni bir necha marta so‘ragan bo‘lishiga qaramasdan, Mehriddin Kuchkarov va Shahboz Rahimberdiyev ushbu holatda Azizbek Ahmedov o‘zida og‘riq va azob his qilayotganligini anglagan bo‘lsa-da, shunga ko‘ra uning og‘ir holatlarga tushib qolishi, shu jumladan, vafot etishi mumkinligiga jinoiy beparvolik bilan e’tibor qilmasdan, o‘zlarining noqonuniy harakatlarini davom ettirgan.

Mehriddin Kuchkarov haydovchi Azizbek Ahmedovni qo‘llarini qayirgan holda, Shahboz Rahimberdiyevning yordami bilan tanasini egib, bosib turishini davom ettirishlari natijasida Azizbek Ahmedovda bo‘lgan yurak ishemik kasalligi kuchli hayajonlanish negizida xuruj qilib, voqea joyida vafot etgan.

Ichki ishlar vazirligining 11-iyundagi bayonotida Ahmedov YPX xodimlari tomonidan ushlanib, “o‘ta mast holatda bo‘lgani gumon qilinib, tibbiy ko‘rikdan o‘tish uchun taklif qilinganida fuqaro ichki ishlar organlari xodimlarining qonuniy talablarini bajarmasdan, faol qarshilik ko‘rsata boshlagani, shu vaqt oralig‘ida tibbiy ko‘rikka olib borish uchun transport vositasiga o‘tqazilgan fuqaroning sog‘lig‘i yomonlashib, voqea joyiga tez tibbiy yordam xizmati chaqirtirilgani, biroq ko‘rsatilgan muolajalarga qaramay, fuqaro Azizbek Ahmedov vafot etgani” ta’kidlanadi.

IIV bayonot bilan birga, holatning bodikamerada olingan videosini ham e’lon qilgandi.