Samarqandda “O‘zbekiston temir yo‘llari” aksiyadorlik jamiyatida ishlovchi 29 yoshli fuqaro mazkur jamiyatiga ishga kiritish uchun 3 ming dollarni olgan vaqtda ashyoviy dalillar bilan qo‘lga olindi. Bu haqda “Daryo”ga Samarqand viloyati IIB Transportda xavfsizlikni ta’minlash boshqarmasi xabar berdi.
Ta’kidlanishicha, 2021-yilning 25-yanvar kuni Samarqand viloyati IIB TXTBga J. ismli shaxs noqonuniy ravishda fuqarolarni temiryo‘l korxona-tashkilotlariga moddiy manfaat evaziga ishga kiritishni va’da qilib, pul olib yurgani to‘g‘risida ma’lumot kelib tushgan.
Ushbu ma’lumotga asosan “Nazorat ostida xarid qilish” tezkor qidiruv tadbiri tashkil etilgan bo‘lib, unga jalb qilingan B. ismli fuqarodan Pastdarg‘om tumanida yashovchi, “O‘zbekiston temir yo‘llari” xodimi R.J. 3 ming dollar evaziga ishga kiritishni va’da qilib, boshlang‘ich hujjatlarini tayyorlash uchun 500 ming so‘m miqdordagi pullarni olgan vaqtida ashyoviy dalillar bilan ushlangan.
Surishtiruv davomida R.J. ushbu olgan pullarining bir qismini Samarqand shahrida yashovchi Z.A. ismli shaxsga (1985-yilda tug‘ilgan) berishini ma’lum qilgan.
27-yanvar kuni olib borilgan tezkor tadbir davomida Z.A. tadbirga jalb etilgan fuqaro B.dan ishga kiritib qo‘yishga oldindan kelishilgan 3 ming dollardan 1000 dollar miqdoridagi pullarni olayotgan vaqtida daliliy ashyolar bilan qo‘lga olingan.
Surishtiruv davomida fuqaro Z.A. muqaddam Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 1-qismi va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 1-qismi bilan sudlangani, hozirda vaqtincha ishsiz ekani aniqlangan.
Mazkur holat yuzasidan tergovga qadar tekshiruv harakatlari olib borilmoqda.
Avvalroq Samarqandda ishga joylash uchun pora olgan maktab direktori va shifokor qo‘lga olingani, Buxoroda hamshiralikka ishga joylashtirish uchun 600 dollar olgan bosh shifokor ushlangani, Buxoroda fuqaroni Milliy gvardiyaga ishga qo‘yish evaziga 2000 dollar olgan shaxslar qo‘lga olingani to‘g‘risida xabar berilgandi.
Izoh (0)