“Uralskiye avialinii” aviakompaniyasining 28-yanvar kungi Samarqand—Yekaterinburg yo‘nalishi bo‘yicha uchayotgan samolyotida texnik nosozlik yuz berdi Bu haqda Transport vazirligi xabar qildi.
Qayd etilishicha, SVR 2862 reysi Toshkent vaqti bilan 07:41 da Samarqand aeroportidan muvaffaqiyatli uchgan. Parvoz davomida Moskva vaqti bilan soat 10:01 da ekipaj komandiri samolyotda texnik nosozlik yuz bergani haqida havo harakatini boshqarish dispetcheriga avariya signalini bergan. Dastlabki ma’lumotlarga ko‘ra, samolyot kabinasi germetizatsiyasida nosozlik yuzaga kelgan.
Kolsovo aeroportining favqulodda xizmatlari samolyotni qabul qilish uchun shay holatga keltirilgan. Bortida 159 nafar yo‘lovchi va 6 nafar ekipaj a’zosi bo‘lgan samolyot Toshkent vaqti bilan soat 10:28 da Kolsovo aeroportiga muvaffaqiyatli qo‘ngan.
Hodisa oqibatida jarohat olganlar yo‘q.
Ushbu hodisa bo‘yicha Sverdlovsk transport prokuraturasi tomonidan parvozlar xavfsizligi to‘g‘risidagi qonun hujjatlarining bajarilishi yuzasidan tekshiruv ishlari olib borilmoqda.
Izoh (0)