To‘qayev Qozog‘istonda hukmron Nur Otan partiyasining raisi etib saylandi. Avval bu lavozimni Nazarboyev egallab kelgan

Qozog‘iston prezidenti Qosim-Jo‘mart To‘qayev hukmron Nur Otan partiyasining raisi etib saylandi. Bu haqda prezident matbuot xizmati Twitter’da e’lon qildi. Ilgari ushbu lavozimni sobiq davlat rahbari Nursulton Nazarboyev egallab kelgan.

Xabarda aytilishicha, partiya qurultoyida amaldagi prezidentning nomzod bir ovozdan qo‘llab-quvvatlangan. Nazarboyevning o‘zi bir necha kun oldin ushbu tashabbus bilan chiqqan va To‘qayev “to‘liq hokimiyatga ega” ekanini ta’kidlagan. Shuningdek, u Qozog‘iston siyosiy elitasida hech qanday ziddiyat yo‘qligi to‘g‘risida ishonch bilan gapirgan.

Nur Otan partiyasi 1999-yilda tashkil etilgan, shundan buyon uni Nazarboyev boshqarib kelayotgandi.

To‘qayevning aytishicha, partiya tubdan qayta qurilishga muhtoj. U siyosiy kuchning tashkiliy tuzilmasini qayta ko‘rib chiqishni taklif qildi: xususan, partiya raisining birinchi o‘rinbosari lavozimi tugatilib, uning o‘rniga mas’ul kotib, “shuningdek, tegishli sohalardagi boshqa kotiblar” lavozimi joriy etiladi, deb yozmoqda Tengrinews.

Nazarboyev 1990-yildan Qozog‘iston prezidenti bo‘lgan. 2019-yilning mart oyida u iste’foga chiqdi, shundan so‘ng respublikada saylovlar bo‘lib o‘tdi va unda To‘qayev g‘alaba qozondi. Ammo o‘shanda Nazarboyev Xavfsizlik Kengashining rahbari, Nur Otan partiyasining yetakchisi, Konstitutsiyaviy kengash a’zosi va Qozog‘iston Xalq Assambleyasining (mamlakatda yashovchi barcha millat va elat vakillarini birlashtirgan maslahat organi) rahbari lavozimlarini o‘zida saqlab qoldi.

2021-yilning aprel oyida Xalq Assambleyasi rahbari lavozimi To‘qayevga o‘tkazildi. 2022-yilning yanvar oyi boshida, respublikadagi norozilik namoyishlari fonida Nazarboyev Xavfsizlik Kengashi rahbari lavozimini ham tark etdi, uni amaldagi prezident egalladi.

27-yanvar kuni Qozog‘iston Senati Nazarboyevga tegishli bo‘lgan elboshi maqomini o‘zgartirish tashabbusi bilan chiqdi. Mamlakat Senati ichki va tashqi siyosatning asosiy yo‘nalishlarini endi birinchi prezident bilan muvofiqlashtirmaslikni taklif qilgan.