Қозоғистон президенти Қосим-Жўмарт Тўқаев ҳукмрон Нур Отан партиясининг раиси этиб сайланди. Бу ҳақда президент матбуот хизмати Twitter’да эълон қилди. Илгари ушбу лавозимни собиқ давлат раҳбари Нурсултон Назарбоев эгаллаб келган.
Хабарда айтилишича, партия қурултойида амалдаги президентнинг номзод бир овоздан қўллаб-қувватланган. Назарбоевнинг ўзи бир неча кун олдин ушбу ташаббус билан чиққан ва Тўқаев «тўлиқ ҳокимиятга эга» эканини таъкидлаган. Шунингдек, у Қозоғистон сиёсий элитасида ҳеч қандай зиддият йўқлиги тўғрисида ишонч билан гапирган.
Нур Отан партияси 1999 йилда ташкил этилган, шундан буён уни Назарбоев бошқариб келаётганди.
Тўқаевнинг айтишича, партия тубдан қайта қурилишга муҳтож. У сиёсий кучнинг ташкилий тузилмасини қайта кўриб чиқишни таклиф қилди: хусусан, партия раисининг биринчи ўринбосари лавозими тугатилиб, унинг ўрнига масъул котиб, «шунингдек, тегишли соҳалардаги бошқа котиблар» лавозими жорий этилади, деб ёзмоқда Tengrinews.
Назарбоев 1990 йилдан Қозоғистон президенти бўлган. 2019 йилнинг март ойида у истеъфога чиқди, шундан сўнг республикада сайловлар бўлиб ўтди ва унда Тўқаев ғалаба қозонди. Аммо ўшанда Назарбоев Хавфсизлик Кенгашининг раҳбари, Нур Отан партиясининг етакчиси, Конституциявий кенгаш аъзоси ва Қозоғистон Халқ Ассамблеясининг (мамлакатда яшовчи барча миллат ва элат вакилларини бирлаштирган маслаҳат органи) раҳбари лавозимларини ўзида сақлаб қолди.
2021 йилнинг апрель ойида Халқ Ассамблеяси раҳбари лавозими Тўқаевга ўтказилди. 2022 йилнинг январь ойи бошида, республикадаги норозилик намойишлари фонида Назарбоев Хавфсизлик Кенгаши раҳбари лавозимини ҳам тарк этди, уни амалдаги президент эгаллади.
27 январь куни Қозоғистон Сенати Назарбоевга тегишли бўлган элбоши мақомини ўзгартириш ташаббуси билан чиқди. Мамлакат Сенати ички ва ташқи сиёсатнинг асосий йўналишларини энди биринчи президент билан мувофиқлаштирмасликни таклиф қилган.
Мавзуга доир:
Изоҳ (0)