Qozog‘iston birinchi prezidenti Nursulton Nazarboyevning kuyovi Timur Kulibayev “Atameken” milliy tadbirkorlar palatasi rahbari lavozimini tark etdi. Bu haqda Kulibayev palata saytiga joylangan bayonotda e’lon qilgan.
“Bugundan boshlab men ‘Atameken’ milliy tadbirkorlar palatasi prezidiumining saylangan raisi lavozimini tark etishga qaror qildim. Milliy tadbirkorlar palatasining oliy nazorat organiga sakkiz yil rahbarlik qilish men uchun katta sharaf va mas’uliyat bo‘ldi”, — deydi Kulibayev.
Uning ta’kidlashicha, shu vaqt ichida biznes va hukumat o‘rtasida konstruktiv muloqot yo‘lga qo‘yilgan va qulay ishbilarmonlik muhiti izchil shakllantirilgan.
Kulibayev Nursulton Nazarboyevning o‘rtancha qizi Dinara bilan oila qurgan.
Avval Qozog‘iston birinchi prezidentining yana ikki kuyovi neft-gaz sohasiga oid yirik kompaniyalardagi lavozimini tark etgandi. Nazarboyevning kenja qizi Aliyaning turmush o‘rtog‘i Dimash Do‘sanov “KazTransOyl” bosh direktori lavozimidan, to‘ng‘ich qizi Darig‘aning “eri” G‘ayrat Sharipbayev esa “QazaqGaz’ Milliy kompaniyasi” AJ boshqaruvi raisi lavozimidan iste’foga chiqqan.
Ularning iste’fosi sabablariga aniqlik kiritilmagan. Bu haqda e’lon qilingan relizda ushbu qarorlar kompaniyalarning direktorlar kengashi tomonidan qabul qilingani aytilgan, xolos.
Shuningdek, Nursulton Nazarboyevning yana bir qarindoshi iste’foga chiqqani haqida xabar berildi. Mamlakatning amaldagi prezidenti Qosim-Jo‘mart To‘qayev Nazarboyevning jiyani, Milliy xavfsizlik qo‘mitasi rahbarining birinchi o‘rinbosari general-leytenant Samat Abishni lavozimidan ozod etish haqidagi farmonni imzolagan.
Avvalroq MXQ matbuot xizmati Abishning yillik ta’tilga chiqqanini, ammo o‘z lavozimida faoliyat yuritishda davom etayotganini ma’lum qilgandi.
Eslatib o‘tamiz, Qozog‘iston Milliy xavfsizlik qo‘mitasining sobiq raisi Karim Masimovga nisbatan davlatga xiyonat bo‘yicha sudga qadar tergov ishi olib borilmoqda. Masimovdan tashqari qo‘mita raisining ikki sobiq o‘rinbosari ham hibsga olingan.
Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘istondagi tartibsizliklar fonida mamlakat bo‘ylab favqulodda holat e’lon qilingan. 6-yanvarda Kollektiv Xavfsizlik Shartnomasi Tashkiloti (KXShT) tinchlikparvar kuchlari Qozog‘istonga jo‘natdi. 7-yanvarda mamlakat prezidenti Qosim-Jo‘mart To‘qayev Qozog‘istonda konstitutsiyaviy tartib tiklanganini e’lon qildi va mamlakat bo‘ylab terrorchilik xavfining yuqori darajasi joriy etildi.Norozilik namoyishlari fonida 5-yanvar kuni To‘qayev Nazarboyevning o‘rniga Xavfsizlik kengashini boshqarishga kirishdi. Nazarboyev umrining oxirigacha mazkur lavozim vakolatlariga ega edi. Keyinroq uning matbuot kotibi Aydos Ukibay Nazarboyev Xavfsizlik kengashi rahbarligini o‘z ixtiyori bilan topshirganini ma’lum qildi.