Rossiya prezidenti Vladimir Putin xavfsizlik bo‘yicha Myunxenda o‘tkaziladigan konferensiyada ishtirok etishni rejalashtirmayapti. Bu haqda uning matbuot kotibi Dmitriy Peskov ma’lum qildi, deb xabar beradi “Kommersant”.
Rossiya prezidenti 2021-yilda ham mazkur konferensiyada ishtirok etmagandi. O‘shanda Rossiya nomidan mamlakat tashqi ishlar vaziri Sergey Lavrov qatnashgan.
“Rossiya prezidenti 18—20-fevral kunlari o‘tkaziladigan ushbu tadbirda ishtirok etadimi” degan savolga Peskov “yo‘q” deya javob qaytargan.
Xavfsizlik bo‘yicha Myunxen konferensiyasi 1963-yildan buyon nemis publitsisti Evald-Genrix fon Kleyst tashabbusiga ko‘ra har yili o‘tkazib kelinadi. 2022-yilda tadbir ikki yildan beri birinchi bor onlayn o‘tkazilmaydi.
Vladimir Putinning 2007-yilda Myunxen konferensiyasidagi nutqi butun dunyoda norozilik uyg‘otgandi. O‘shanda Rossiya yetakchisi mavjud dunyo tartibini keskin tanqid qilgan. U, asosan, AQShning tashqi siyosati, NATO’ning sharqqa kengayishi va dunyoning bir qutbliligi haqida gapirgan edi.
Eslatib o‘tamiz, 20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qilgandi. Putin bunga javoban agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytgan. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini bildirgan va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qilgan.
Izoh (0)