Россия президенти Владимир Путин хавфсизлик бўйича Мюнхенда ўтказиладиган конференцияда иштирок этишни режалаштирмаяпти. Бу ҳақда унинг матбуот котиби Дмитрий Песков маълум қилди, деб хабар беради «Коммерсантъ».
Россия президенти 2021 йилда ҳам мазкур конференцияда иштирок этмаганди. Ўшанда Россия номидан мамлакат ташқи ишлар вазири Сергей Лавров қатнашган.
«Россия президенти 18—20 февраль кунлари ўтказиладиган ушбу тадбирда иштирок этадими» деган саволга Песков «йўқ» дея жавоб қайтарган.
Хавфсизлик бўйича Мюнхен конференцияси 1963 йилдан буён немис публицисти Эвалд-Генрих фон Клейст ташаббусига кўра ҳар йили ўтказиб келинади. 2022 йилда тадбир икки йилдан бери биринчи бор онлайн ўтказилмайди.
Владимир Путиннинг 2007 йилда Мюнхен конференциясидаги нутқи бутун дунёда норозилик уйғотганди. Ўшанда Россия етакчиси мавжуд дунё тартибини кескин танқид қилган. У, асосан, АҚШнинг ташқи сиёсати, НАТOнинг шарққа кенгайиши ва дунёнинг бир қутблилиги ҳақида гапирган эди.
Эслатиб ўтамиз, 20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилганди. Путин бунга жавобан агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтган. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини билдирган ва Зеленскийни «ўзига қулай бўлган исталган вақтда» Москвага келишга таклиф қилган.
Изоҳ (0)