Peru hukumati mamlakat poytaxti Lima va unga yondosh Kalyao avtonom okrugida jinoyatchilik ortib ketgani bois 45 kunga favqulodda holat joriy etish to‘g‘risidagi qarorni ma’qulladi, deb xabar beradi Andina agentligi.
Ma’lum qilinishicha, favqulodda holat rejimi davrida fuqarolarning uy-joy daxlsizligi, yig‘ilishlar erkinligi va shaxsiy daxlsizlik huquqi kabi ayrim huquq va erkinliklari cheklanadi. Jamoat xavfsizligi oldingidek politsiya tomonidan ta’minlanadi, biroq zarurat tug‘ilganida ular yordam so‘rab, harbiylarga murojaat qilishi mumkin.
“Agarda politsiyada jinoyat sodir etgan biror jinoiy tashkilot yoki shaxs haqida ma’lumot paydo bo‘lsa, ular ushbu binoga sud ruxsatisiz kira oladi”, — deydi Ichki ishlar vazirligining maslahatchilar guruhi rahbari Dimitriy Senmache.
Eslatib o‘tamiz, 2021-yil oktabr boshida Peruda bosh vazir va hukumat almashtirilgan edi. Xususan, sobiq bosh vazir Gvido Bellidoning o‘rniga mamlakat Kongressining sobiq raisi Mirta Vaskes xonim yangi bosh vazir sifatida qasamyod qabul qilgan. Noyabrda esa Peru mudofaa vaziri Uolter Edison Ayala Gonsales iste’foga chiqishini e’lon qilgandi. Dekabr oyida Peru prokuraturasi prezident Pedro Kastilioni lavozimni oshirish ishlariga aralashganlikda gumonlab, so‘roqqa tutmoqchiligi ma’lum bo‘lgan.
Izoh (0)