Rossiyada o‘tgan bir sutka ichida 88 816 kishida koronavirus aniqlandi va 665 bemor vafot etdi. Bu haqda COVID-19 ga qarshi kurash bo‘yicha federal tezkor shtabi ma’lumotlariga tayanib, “Interfaks” xabar berdi. Bu pandemiya boshlanganidan beri eng yuqori ko‘rsatkich bo‘lib, avvalgi antirekord bir kun avval qayd etilgandi — 74 692 kishi (kunlik o‘sish 14 124 kishi).
COVID-19 ga chalinish holatlarining aksariyati, odatdagidek, Moskvada aniqlangan — 26 586 kishi, u yerda bir kun oldin 19 856 kishida infeksiya tasdiqlangandi.
Tezkor shtab ma’lumotlariga ko‘ra, mamlakatning 74 ta viloyatida koronavirusning omikron shtammi aniqlangan bo‘lib, bu 20-yanvar holati bilan taqqoslaganda 19 ta viloyatga ko‘p demak.
Avvalroq bosh vazir o‘rinbosari Tatyana Golikova yangi shtamm Rossiyada yetakchiga aylanganini ma’lum qilgandi. Chunki 26-yanvar holati bo‘yicha aniqlangan holatlarning 47,9 foizini delta, 52,1 foizini esa omikron va boshqa variantlar tashkil etmoqda.
Bir sutka davomida koronavirus asoratlari oqibatida vafot etganlar soni 16-yanvardan buyon deyarli bir xil darajada qolmoqda — 700 kishidan oshmayapti.
Rossiyada pandemiya boshlanganidan buyon 11 million 404 ming 617 kishida COVID-19 tasdiqlangan, 328 770 kishi vafot etgan va 10 million 129 ming 691 kishi sog‘aygan.
Rossiyada koronavirus bilan kunlik kasallanishlar soni 25-yanvar holatiga 74 692 kishini, 24-yanvar holatiga 65 109 kishini, 23-yanvar holatiga 63 205 kishini, 22-yanvar holatiga 57 212 kishini tashkil etib, mamlakatda har kuni COVID-rekordlar o‘rnatilmoqda.
Izoh (0)