Toshkent shahri va viloyatida 25-yanvar kuni qalin tuman tushish holati kuzatildi. AOKAda o‘tkazilgan brifingda Gidrometeorologiya xizmati markazi direktorining birinchi o‘rinbosari Ibratjon Karimov tuman inson salomatligi uchun xavfsiz ekanini ma’lum qildi.
Qayd etilishicha, odatda O‘zbekistonda qish mavsumida sovuq antisiklon ta’sirida Quyoshning chiqishi va botishidan so‘ng qalin tuman tushish holatlari tez-tez takrorlanib, tabiiy jarayon hisoblanadi. Ushbu hodisa suv bug‘larining kuchli to‘yinishi natijasida yuz berib, bu turdagi tuman sutkalab davom etmaydi, aksincha 3-4 soat vaqt oralig‘ida tarqalib ketadi.
25-yanvar kuni kechasi sovuq antisiklon ta’sirida Toshkent shahri va Toshkent viloyatida qalin tuman tushish holati kuzatilgan. Ko‘rinuvchanlik joylarda 50—200 metrgacha cheklangan. Tuman tushgan paytda Toshkent shahridagi yuqori sezuvchanlikka ega atmosfera havosining ifloslanish darajasini o‘lchaydigan statsionar postlarda mayda dispers zarrachalar miqdori 111,2 mikrogramm metr/kubni tashkil etgan. Ko‘rsatkich sanitar me’yor qoidalariga ko‘ra inson salomatligi uchun xavfsiz daraja hisoblanadi.
Eslatib o‘tamiz, shu kuni tushgan qalin tuman sababli Toshkent aeroportining faoliyati cheklanib, hududga samolyotlar qo‘nishi to‘xtatilgan.
Izoh (0)