Shavkat Mirziyoyev boshchiligida o‘tkazilayotgan yig‘ilishda “Davlat – inson uchun” g‘oyasini hayotga tatbiq etish maqsadida 2022–2026-yillarga mo‘ljallangan Yangi O‘zbekistonning taraqqiyot strategiyasi mazmuniga to‘xtalib o‘tildi. Bu haqda “Daryo” muxbiri xabar qildi.
Jumladan, ushbu strategiyada:
- yaqin va o‘rta istiqbolda O‘zbekistonning taraqqiyot tendensiyalari qanday bo‘ladi?
- kelgusidagi faoliyatimizni belgilaydigan aynan qaysi maqsad va vazifalar, biz uchun eng dolzarb va ustuvor hisoblanadi?
- davlat va jamiyat hayotining barcha jabha va yo‘nalishlarini kompleks rivojlantirish uchun asosiy e’tiborni nimalarga qaratishimiz kerak?
- keyingi yillarda qabul qilingan qonun va qarorlarimiz, dastur va rejalarimizni yangi davrda qanday davom ettirishimiz, ularga qanday qo‘shimcha va o‘zgartirishlar kiritishimiz kerak degan savollarga chuqur va atroflicha javob berilgani qayd etildi.
Davlat rahbari demokratik islohotlarning uzviyligi va davomiyligini ta’minlash maqsadida kelgusi faoliyat uchun “Harakatlar strategiyasidan – Taraqqiyot strategiyasi sari” degan prinsipni bosh tamoyil etib belgilanganini bildirdi. Shu asosda 2022-yil – “Inson qadrini ulug‘lash va faol mahalla yili” bo‘yicha davlat dasturi tayyorlanib, keng jamoatchilik muhokamasidan o‘tkazilgani ta’kidlandi.
Albatta, inson qadri biz uchun qandaydir mavhum, balandparvoz tushuncha emas. Inson qadri deganda, biz, avvalo, har bir fuqaroning tinch va xavfsiz hayot kechirishini, uning fundamental huquq va erkinliklarini ta’minlashni nazarda tutamiz”, — deydi Mirziyoyev.Inson qadri deganda, prezident har bir fuqaro uchun munosib turmush sharoiti va zamonaviy infratuzilma tashkil etish, malakali tibbiy xizmat ko‘rsatish, sifatli ta’lim, ijtimoiy himoya tizimi, sog‘lom ekologik muhit yaratib berish ekanligini ma’lum qildi.
Bu maqsadga erishish uchun esa dunyodagi noyob demokratik tuzilma bo‘lgan mahalla institutining katta imkoniyatlaridan samarali foydalanish, uning vakolatlarini yanada kengaytirish, natijada mahallani jamiyatning hal qiluvchi bo‘g‘iniga aylantirish vazifasi qo‘yilganini bildirdi.
2022-yilga mo‘ljallangan Davlat dasturi loyihasining muhokamasi fuqarolar bilan “ochiq muloqot” shaklida o‘tkazilib, xalq tomonidan keng qo‘llab-quvvatlani, muhokama jarayonida aholidan 17 mingdan ziyod takliflar kelib tushgani aytildi.
Ularning barchasi yo‘nalishlar bo‘yicha o‘rganilgani, bir-biriga yaqin takliflar umumlashtirilib, Dastur loyihasi 300 dan ortiq yangi tashabbuslar bilan to‘ldirilgani ma’lum bo‘ldi.
Fuqarolar bildirgan:
- mahallalarda “Ish markazlari”ni tashkil etish, mahallada hokimlar, sektor rahbarlarining onlayn qabulini o‘tkazish;
- davlat va jamiyat hayotida faol ishtirok etgan fuqarolarni rag‘batlantirish;
- har bir mahallani rivojlantirish strategiyasini ishlab chiqish;
- aholi kayfiyatini sotsiologik so‘rovnomalar orqali o‘rganib borish;
- yoki uzoq hududlardagi maktablarga avtobus qatnovini yo‘lga qo‘yish kabi takliflar bizga ayniqsa ma’qul bo‘lgani alohida qayd etildi.
Izoh (0)