Pfizer Inc. va BioNTech SE kompaniyalari koronavirusga qarshi vaksinasining omikron shtammi bilan kurashish uchun maxsus ishlab chiqilgan yangi versiyasi klinik sinovlarini boshladi. Bu haqda kompaniyalar bayonotiga tayanib, Reuters xabar berdi.
Agentlik ma’lumotlariga ko‘ra, kompaniyalar yangi vaksinaning himoyasini buster doza va vaksinaning uchta alohida dozasi ko‘rinishida ilgari emlanmagan odamlarda sinab ko‘rishni rejalashtirmoqda. AQShda o‘tkaziladigan sinov jarayonida 18 yoshdan 65 yoshgacha bo‘lgan 1400 dan ortiq odam ishtirok etishi kutilmoqda.
“Ushbu vaksinaning maqsadi jiddiy kasallikdan himoya qilishdir. Bugungi kunga kelib, bu vaksinalar o‘z vazifasini bajarmoqda, jumladan, omikrondan himoya qilmoqda”, — dedi Pensilvaniya universiteti yuqumli kasalliklar bo‘yicha mutaxassis doktor Pol Offit.
Kompaniya rasmiylarining ta’kidlashicha, 2022-yilda COVID-19 ga qarshi vaksinalarining to‘rt milliard dozasini ishlab chiqarish rejalashtirilmoqda, agar sinovlar muvaffaqiyatli o‘tsa, bu raqam yangi vaksina dozalarini ham o‘z ichiga oladi. Yangi vaksinani sinovdan o‘tkazish davomida 615 kishi hozirgi Pfizer-BioNTech vaksinasining ikki dozasini, keyin esa omikronga qarshi yangi vaksinaning bir yoki ikki dozasini oladi. Tadqiqotning vaksina olmagan 205 nafar ishtirokchilari esa biryo‘la omikronga qarshi yangi vaksinasining uchta dozasini oladi.
Pfizer kompaniyasida ta’kidlanishicha, asl vaksinaning ikki dozasi omikrondan himoyalanish uchun yetarli bo‘lmasligi, kasalxonaga yotqizish va o‘limlarning oldini olishda samarasi past bo‘lishi mumkin. Biroq AQSh Kasalliklarni nazorat qilish va oldini olish markazlari Pfizer/BioNTech vaksinasi kabi mRNK vaksinasining uchinchi dozasi COVID-19 tufayli kasalxonaga yotqizishlardan 90 foiz himoya qilishini da’vo qilmoqda.
Sinovlarda maxsus ishlab chiqilgan vaksinaning kerak yoki yo‘ligi, shuningdek, uning xavfsizligi, chidamliligi va immunogenligini tekshirish rejalashtirilgan. Kompaniyalar tajribalarni yakunlash muddatini belgilamagan.
Avvalroq AQShning Moderna farmatsevtik kompaniyasi omikron shtammiga qarshi vaksina sinovlarini yaqin haftalarda boshlashini e’lon qilgandi. Noyabr oyining oxirida Johnson & Johnson korporatsiyasi omikron shtammiga qarshi vaksina yaratishni boshlagandi.
Izoh (0)