Qozog‘iston hukumati iste’molchilarni energiya bilan ta’minlash masalalari hal etilganini ma’lum qildi, deb yozmoqda Qozog‘iston bosh vazirining matbuot xizmatiga tayanib, “Tengrinews”.
“2022-yil 25-yanvar kuni mahalliy vaqt bilan 11:59 da Nur-Sultonda energiya iste’moli tizimida elektr ta’minoti o‘chib qolgan. Bunga Markaziy Osiyo energiya tizimidagi 500 kilovattli “Shimol–Sharq–Qozog‘iston janubi” elektr tranzitida yuklamaning ortib ketishi sabab bo‘lgan.
Elektr tarmoqlariga zarar yetmasligini ta’minlash va “Shimol–Sharq–Qozog‘iston janubi” elektr tranzitida katta tizimli avariya sodir bo‘lishining oldini olish maqsadida avariyaga qarshi avtomatik tizim ishlatildi, bu Qozog‘iston janubidagi aholining elektr ta’minotidan uzilib qolishiga olib keldi. Kutilmagan hodisa vaziyatida Qozog‘iston janubidagi aholining o‘rtacha elektr iste’moli 3200 megavattni tashkil etgan”, – deyiladi xabarda.
Qayd etilishicha avariyaga qarshi avtomatik tizim tufayli Jambil GRES, Chimkent-3 va Qizilo‘rda 6-issiqlik elektr stansiyalari hamda Olmaotadagi elektr stansiyaning 1300 megavatt hajmdagi iste’molchilar elektr ta’minoti saqlab qolindi. Majburiy cheklovlar 1900 megavattni tashkil qilgan.
“Markaziy Osiyo energiya tizimi uchun me’yoriy 50 Gts chastota 47ga tushib ketgan, oqibatda O‘zbekiston va Qirg‘iziston energiya tizimlari o‘chib qolgan”, – deya qo‘shimcha qilgan Qozog‘iston hukumati rasmiylari.
Qozog‘iston vaqti bilan soat 13:39 da Qozog‘iston milliy elektr tarmoqlarining tuzilmasi me’yorga keltirilgan. Parallel ravishda Qirg‘iziston energiya tizimi ham qayta tiklangan.
“Soat 14:53 da (Toshkent vaqti bilan 13:53 da) Olmaota shahri va Olmaota viloyatidagi elektr ta’minotidagi muammolar ham hal etilgan.
15:10 da “Jambil” va “Chimkent” podstansiyalaridagi kuchlanish 500 kilovattga yetdi. Qozog‘iston janubidagi elektr iste’molchilarining ehtiyojlari soat 16:00 ga borib to‘liq qondirildi.
O‘z vaqtida ko‘rilgan chora-tadbirlar natijasida elektr ta’minoti tiklandi va maksimal darajada qisqa vaqtda energiya tizimi me’yorga keldi va iste’molchilar uchun elektr yetkazib berish ishlari tashkil qilindi.
O‘zbekiston va Qirg‘iziston energiya tizimilarida ham iste’molchilar elektr ta’minotidan uzilib qoldi. Qozog‘iston tomoni bilan parallel ravishda amalga oshirilgan ishlar sabab O‘zbekistonda ham avariya oqibatlari bartaraf etilgan, hududiy stansiyalarda elektr ta’minotini bosqichma-bosqich ulash ishlari davom etmoqda”, – deyiladi Qozog‘iston bosh vaziri matbuot kotibining bayonotida.
O‘zbekistonda nimalar bo‘ldi?
25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytildi. Toshkent shahar IIBB tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qildi.
Mavzuga doir: Elektr tizimidagi uzilishlar oqibatida yetkazilgan zarar hisob-kitob qilinadi — Moliya vazirligi
Energetika vazirligi Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlanganini bildirdi. “Daryo” nashri xodimlari va o‘quvchilari soat 14:00 holatiga Toshkent shahrining ayrim hududlarida elektr ta’minoti tiklanganini xabar qildi.
Keyinroq Prezident matbuot kotibi Sherzod Asadov “vaziyat shaxsan prezident nazorati ostida” ekanini ma’lum qilib, fuqarolarni sarosimaga tushmaslikka chaqirdi. Shavkat Mirziyoyev topshirig‘i bilan elektr energiyasida kuzatilayotgan nosozlik bo‘yicha hukumat ishtirokida komissiya tuzildi.
17:00 da Energetika vazirligi Qoraqalpog‘iston va Xorazmda elektr energiyasi to‘liq tiklanganini xabar qildi. 18:00 dan keyin Toshkent shahri va Sirdaryo viloyatining bir qator hududlarida ichimlik suvi ta’minoti tiklandi. 19:00 da Toshkent IESning faoliyati qisman tiklanib, 7 ta energoblokdan 5 tasi barqaror ish faoliyatiga keltirilgani ma’lum qilindi.
Shuningdek, 19:30 dan keyin Favqulodda vaziyatlar vazirligi Qamchiq dovonidagi avtoyo‘l tunellarida yoritish tizimlari tiklangani haqida xabar berdi. Markaziy Osiyo yagona elektr tarmog‘ida 25-yanvar kuni katta avariya bo‘lishi oqibatida O‘zbekistonning Afg‘onistonga elektr energiyasi yetkazib berishni to‘xtatgani oydinlashdi.
Izoh (0)