Conflict Intelligence Team (CIT) tergov guruhi rossiyalik desantchilar Ukraina chegarasi yaqiniga tashlanayotganini ma’lum qildi.
24-yanvar kuni TikTok ijtimoiy tarmog‘ida temiryo‘l bo‘ylab tashilayotgan harbiy texnikalar videosi paydo bo‘lgan. Ta’kidlanishicha, mazkur rolik Belarus va Ukraina chegarasida joylashgan Bryansk viloyatida tasvirga olingan.
Videoda texnikalar ortilgan va brezent bilan yopib qo‘yilgan temiryo‘l tarkibini ko‘rish mumkin. Tadqiqotchi Robert Lining so‘zlariga ko‘ra, tarkib 31 ta “BMD-4M” jangovar desant mashinalari va sakkizda “BTR-MDM” zirhli transportyorini tashigan.
“Bundan tashqari, poyezd tarkibida beshta yo‘lovchi vagoni ham bor bo‘lib, u 250 dan ortiq kishini tashishga imkon beradi. Shuningdek, platformalarda havo-desant kuchlari uchun mo‘ljallangan qisqartirilgan ikki o‘qli sakkizta ‘KamAZ-43501’ yuk mashinalarini sanadik”, — deyiladi CIT xabarida.
Tergov guruhining Rossiya temiryo‘llari ma’lumotlar bazasiga tayanib ma’lum qilishicha, poyezd Ivanov viloyatidagi “Tekstilniy” stansiyasidan harakatlangan. Ta’kidlanishicha, uning yonida 98-havo-desant diviziyasining 217-gvardiya parashyut-desant polka joylashgan. “Bu desantchilarning Ukarina chegarasi yaqiniga joylashtirilayotganini isbotlovchi birinchi video”, — deya qo‘shimcha qiladi CIT.
Avvalroq Rossiya—Belarus harbiylari o‘rtasidagi qo‘shma o‘quv mashg‘ulotlar 2022-yilning fevralida o‘tkazilishi to‘g‘risida xabar berilgandi. Belarus prezidenti Aleksandr Lukashenko 17-yanvar kuni Minskda o‘tkazilgan yig‘ilishda qo‘shma o‘quv mashg‘ulotlari fevralda boshlanishini ma’lum qilgan. Shuningdek, uning so‘zlariga ko‘ra, Boltiqbo‘yi davlatlari va Polshaning o‘n minglab harbiy xizmatchilari e’tibori Belarus chegarasiga qaratilgan. 18-yanvar kuni esa Rossiya Qurolli Kuchlarining “Ittifoqchilik jasorati” qo‘shma o‘quv mashg‘ulotlarida ishtirok etadigan ilk bo‘linmalari Belarusga yetib keldi.
Izoh (0)