Gretsiyaga yog‘gan kuchli qor sabab “Attiki odos” milliy avtotrassasida 5 ming mashinaning harakati to‘xtab qoldi, ko‘plab haydovchilarning qor tuzog‘iga tushganiga 12 soatdan oshdi, deb xabar beradi “RIA Novosti”.
Ma’lum qilinishicha, avtotrassada bir necha kilometrlik tirbandliklar yuzaga kelgan — yozgi shinalar kiygizilgan mashinalar harakatlana olmayapti, chunki yo‘llarni butunlay qor bosgan.
Ta’kidlanishicha, Gretsiyaning ayrim tumanlari elektr energiyasisiz qolgan. 25-yanvar dam olish kuni deb e’lon qilingan bo‘lib, qator tumanlarda bog‘cha va maktablar faoliyati to‘xtatilgan. Faqat oziq-ovqat do‘konlari va dorixonalar ishlamoqda. Sinoptiklarning so‘zlariga ko‘ra, noqulay ob-havo sharoiti 26-yanvarga qadar davom etadi.
Gretsiya hukumati 24-yanvar kuni kechqurun “Attiki odos”da qolib ketgan yuzlab mashinalarni chiqarib olish bo‘yicha keng ko‘lamli operatsiyalarni boshlagan. Haydovchilar harakatini ta’minlash uchun o‘tkazilayotgan operatsiyalar o‘t o‘chirish xizmati, politsiya va qurolli kuchlar, shuningdek, ko‘ngillilar yordamida amalga oshirilmoqda.
“Dastlabki uch soat ichida, taxminan, yuzta haydovchiga yordam berdik”, — deyiladi xabarda. Haydovchilarga yegulik va suv tarqatilmoqda.
“Qor qattiq yog‘ayotgani va o‘nlab avtomobillar tuzoqda qolib ketgani sabab armiya operatsiyasi juda murakkab sharoitda o‘tkazilyapti. Besh mingga yaqin haydovchi bloklangani haqida ma’lumotlar bor”, — deb yozadi “Proto tema” nashri. Ta’kidlanishicha, vaziyatni yoritib borayotgan bir nechta jurnalist ham qorli tuzoqqa tushib kelgan.
Avvalroq Turkiya janubida rekord darajadagi qor bo‘ronlari kuzatilgani, Toshkent va Istanbul o‘rtasidagi aviaparvozlar kuchli qor sabab kechiktirilgani to‘g‘risida xabar berilgandi.
Mavzuga doir: Saudiya Arabistonida qor yog‘di (foto)
Izoh (0)