Kurdlar ikki kun avval Suriyadagi Xasaka shahrida Gvayran qamoqxonasini egallagan va u yerdagilarni (bolalar ham bor) garovga olgan IShID jangarilarini hududda siquvga olgan. Bu haqda France24 xabar berdi.
Qayd etilishicha, AQSh qurollari va kiyimlaridagi kurd otryadlari besh kundan beri IShID terrorchilariga qarshi jang olib bormoqda. 20-yanvarda 100 ga yaqin jihodchilar Gvayrandagi qamoqxonaga hujum uyushtirgan va u yerdagi mahbuslarni, xususan, o‘z sheriklarini ozod qilishga uringan. Janglar oqibatida 160 ga yaqin odam halok bo‘lgan va ular orasida 45 nafari kurdlar. Shuningdek, yetti nafar tinch aholi vakillari ham halok bo‘lgan.
Xabarlarga ko‘ra 24-yanvarda 300 ga yaqin jangarilar hukumat qo‘shinlariga taslim bo‘lgan, ammo qamoqxonada 100 dan ziyod jihodchilar 30 ga yaqin odamni garovda ushlab turibdi.
25-yanvar kuni kurdlar jangarilar bilan ichkariga shifokorlarni kiritish va yaralanganlarga tibbiy yordam ko‘rsatish yuzasidan muzokaralar olib borgan. Kurdlar terrorchilarning asirlarni va qamoqxona qo‘riqchilarini ozod qilishni so‘ramoqda.
Avval Suriyadagi Xama viloyatida do‘konda yuz bergan portlash oqibatida ikki nafar tinch aholi vakili halok bo‘lgani va yana bir kishi jarohatlangani xabar qilingan. Shuningdek, AQSh IShIDning Afg‘onistondagi bo‘linmasiga aloqador afg‘onlarga qarshi sanksiyalar qo‘llagani, “Tolibon” Qandahorda IShIDning 3 nafar jangarisini o‘ldirgani, Iroqda IShID yetakchilaridan biri yo‘q qilingani xususida xabarlar berilgan
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)