Buxoro shahrida mashina yuvish shoxobchasidagi Nexia-3 avtomobili o‘g‘irlab ketildi, deya xabar beradi IIV matbuot xizmati.
Ma’lum qilinishicha, 16-yanvar kuni soat 07:00 larda Buxoro viloyati IIB navbatchilik qismiga Buxoro shahar Farog‘iy ko‘chasida yashovchi fuqaro ukasiga tegishli Nexia mashinasi avtomobillarni yuvish shoxobchasidan o‘g‘irlab ketilgani to‘g‘risida ariza bilan murojaat qilgan.
Holat yuzasidan Buxoro shahar IIO FMB 4-son IIB Tergov guruhi voqea joyida bo‘lib, shoxobchani ko‘zdan kechirgan. Taxminlarga ko‘ra, avtomobilni olib qochishda gumonlangan shaxs shoxobcha ishchisi bo‘lgan.
Aniqlanishicha, gumonlanuvchi 2021—2022-yillar davomida “Sherxon” MFYda joylashgan “moyka”da vaqtincha og‘zaki kelishuv asosida ishlab kelgan. 15-yanvar kuni 23:30 larda o‘ziga yuvish uchun topshirilgan mashinani minib qochgan.
“Yuvib bo‘lganimdan so‘ng, mashinani so‘roqsiz haydab ketdim. Ortimdan quvishgani uchun qo‘rqib, cho‘lga kirib ketdim. Cho‘lda mashina o‘chib qoldi va mashinani qarovsiz qoldirib ketdim”, — deydi gumonlanuvchi.
Mazkur holat yuzasidan fuqaro O.Z.ga nisbatan Jinoyat kodeksining 267-moddasi (transport vositasini olib qochish) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda. Gumonlanuvchiga qamoqqa olish tarzidagi ehtiyot chorasi qo‘llanilgan.
Bundan avval Buxoroda mast fuqaro tanishining Spark avtomobilini olib qochgani, Andijonda olib qochilgan Spark ikkita avtomobilga borib urilgani hamda Farg‘onada sobiq kuyov qaynonasining mashinasini olib qochgani haqida xabar berilgandi.
Izoh (0)