Sanitariya-epidemiologik osoyishtalik va jamoat salomatligi xizmati ma’lumotiga ko‘ra, 2022-yilning 5—15-yanvar kunlari O‘zbekistonda jami 300 mingdan ziyod PZR-test sinamasi o‘tkazilgan. Bu haqda SSV matbuot xizmati xabar berdi.
Ta’kidlanishicha, so‘nggi kunlarda esa kuniga o‘rtacha 45-50 ming nafarga yaqin fuqarodan PZR-test olinmoqda. Ma’lumot uchun, 2021-yil dekabr oyining oxirgi haftasida yurtimizda kuniga 15-20 ming dona ana shunday sinama tahlillari o‘tkazilgan.
Toshkent shahrining 12 ta tumanida 1 tadan maxsus COVID-poliklinikalari faoliyati yo‘lga qo‘yilgani, ularda koronavirusga qarshi PZR-test sinamalari har kuni 24 soat davomida topshirilishi mumkinligi to‘g‘risida xabar berilgandi. Bundan tashqari, fuqarolar Sanitariya-epidemiologik osoyishtalik va jamoat salomatligi xizmatining har bir tuman va shahar bo‘limlarida ham shunday imkoniyatdan foydalanishlari mumkin. Ushbu laboratoriyalarda PZR-test tahlillari har kuni 24 soat davomida bepul o‘tkaziladi.
Avvalroq Zangiota 1-son yuqumli kasalliklar shifoxonasi direktori Anvar Husanov koronavirusning yangi turi oldingi delta va “britancha” shtammlariga nisbatan biroz yengil o‘tayotganini ma’lum qilgandi. Uning so‘zlariga ko‘ra, ayni paytda muassasada koronavirusga chalingan 1300 nafardan ziyod bemor davolanmoqda. So‘nggi kunlarda aholi orasida kasallanish holatlari ko‘p kuzatilayotgani bois, 5-yanvardan shifoxonaga murojaat qilayotgan bemorlar soni ham keskin oshgan.
Izoh (0)