Пашинян Инсон ҳуқуқлари бўйича Европа судида Арманистонга қарши ишда ютиб чиқди

Инсон ҳуқуқлари бўйича Европа суди (ИҲEС) Арманистон бош вазири Никол Пашинян иши бўйича қарор чиқарди. У 2008 йили Ереванда бўлиб ўтган намойишлардан кейинги жиноий таъқиб сабаб ИҲEСга мурожаат қилганди, деб хабар беради «РБК».

2008 йилнинг февралида Арманистоннинг учинчи президенти учун сайловлар бўлиб ўтган. Унда Серж Саргсян ғолиб чиққан. Унинг асосий рақиби бўлган биринчи президент Левон Те-Петросяннинг тарафдорлари овоз бериш якунлари эълон қилингач, норозилик намойишини уюштирган. Пашинян унда фаол иштирок этган. Намойишчиларнинг полиция билан тўқнашувлари оқибатида 10 киши ҳалок бўлган, 200 га яқин одам жароҳат олган. Намойишлардан кейин Пашинянга нисбатан қидирув эълон қилинган ва у бир йилдан ортиқ вақт давомида ҳуқуқ-тартибот органларидан яшириниб юрган. 2009 йилда у ҳукуматга таслим бўлган ва ҳибсга олинган, 2010 йилда эса оммавий тартибсизликларни ташкиллаштиргани учун етти йилга озодликдан маҳрум этилган.

Бўлажак бош вазир 2011 йилнинг майида, республика мустақиллигининг 20 йиллиги муносабати билан эълон қилинган амнистия сабаб озодликка чиққан.

ИҲEСПашинянга нисбатан чиқарилган ҳукм Инсон ҳуқуқлари бўйича Европа конвенциясининг 5 ва 11-моддаларини – шахс эркинлиги ва шахсий дахлсизлиги ҳамда тинч йиғинлар ўтказиш ҳуқуқини бузган деб топган. «Тинч иштирокчилар (норозилик намойишлари — таҳр.) бошқалар томонидан содир этилган қораланган ҳаракатлар учун жавобгарликка тортилмаслиги керак», — дейилади суд қарорида.

Пашинян моддий компенсация талаб қилмаган, шу сабабли суд уни белгиламаган.

2008 йилда Пашинян Ҳайкакан Зҳаманак (Armenian Times) газетасининг бош муҳаррири бўлган. қамоқдан чиққач у Арманистон миллий конгресси номидан парламентга сайланган, 2017 йилда эса қайта сайланган ва шу йилнинг ўзида Ереван мери учун сайловларда иштирок этиб, Тарон Маргарянга ютқазиб қўйган.

Пашинян Арманистонда 2018 йилда содир бўлган «бахмал инқилоби» етакчиларидан бири. Ўшанда намойишчилар Саргсяннинг бош вазирликдан кетишини талаб қилган. Намойишлар вақтида 22 апрель куни Пашинян ва 270 дан ортиқ одам ушланган, бироқ эртаси куни қўйиб юборилган. 8 май куни Пашинян янги ҳукумат раҳбари этиб сайланган.

Шундан сўнг Пашинян икки марта — 2018 йилнинг октябри ва 2021 йилнинг апрелида парламентни тарқатиб юбориш ва муддатидан олдин парламент сайловларини ўтказиш учун истеъфога чиқди. Иккала ҳолатда ҳам у қайта сайланган.