Uzbekistan Airports Astra DCS yo‘lovchi va yuklarni ro‘yxatdan o‘tkazish tizimini bosqichma-bosqich joriy qilishni boshladi. Bu haqda kompaniya matbuot xizmati xabar berdi.
Ma’lum qilinishicha, Namangan xalqaro aeroporti “Uralskiye avialinii” aviakompaniyasining Namangan—Moskva yo‘nalishi bo‘yicha qatnovga birinchilardan bo‘lib ushbu tizim bo‘yicha xizmat ko‘rsatdi. Yangi ro‘yxatga olish tizimi bo‘yicha ikkinchi qatnov ham 12-yanvar kuni soat 03:00 da Namangan aeroportidan Yekaterinburgga amalga oshiriladi.
“Ilgari barcha aeroportlar milliy aviakompaniyaning bitta ro‘yxatdan o‘tish tizimidan foydalanardi. Keyinchalik aeroportlar uchun o‘zlarining ro‘yxatga olish tizimiga ega bo‘lish ehtiyoji tug‘ildi. Uzbekistan Airports Sirena Travel kompaniyasining Astra DCS tizimini tanladi.
O‘zbekistonning barcha 11 ta xalqaro aeroporti, o‘zining ro‘yxatga olish tizimiga ega bo‘lmagan barcha aviakompaniyalar ham ushbu tizimga bosqichma-bosqich o‘tkaziladi. Astra DCS tizimi grafik interfeysga ega bo‘lib, yo‘lovchilar va yuklarni tez va qulay tarzda ro‘yxatdan o‘tkazish imkonini beradi”, — deydi Uzbekistan Airports boshqaruvi raisining birinchi o‘rinbosari Javlon Umarxo‘jayev.
Xabarda ta’kidlanishicha, ushbu ijrochi ochiq tanlov tartib-taomillari natijalari asosida tanlangan. Sirena Travel kompaniyasining Astra DCS — yo‘lovchilar va yukni ro‘yxatdan o‘tkazish jarayonining barcha zarur operatsiyalarini avtomatik ravishda bajarilishini ta’minlaydigan zamonaviy ko‘p tilli xosting tizim.
Mavzuga doir:
- “Hozirda odamlarni aeroportlarga kiritishga shunchaki sharoit yo‘q, ammo tez orada vaziyat o‘zgaradi” — Ra’no Jo‘rayeva
- O‘zbekistonda aeroportlar xususiylashtirilmaydi, chunki “bunday sog‘in sigir o‘zimizga ham kerak”
- Hamma gap yerda. Toshkent aeroporti “xira kirakashlar”ga qarshi qanday kurashmoqchi?
Izoh (0)