Uzbekistan Airports Astra DCS йўловчи ва юкларни рўйхатдан ўтказиш тизимини босқичма-босқич жорий қилишни бошлади. Бу ҳақда компания матбуот хизмати хабар берди.
Маълум қилинишича, Наманган халқаро аэропорти «Уралские авиалинии» авиакомпаниясининг Наманган—Москва йўналиши бўйича қатновга биринчилардан бўлиб ушбу тизим бўйича хизмат кўрсатди. Янги рўйхатга олиш тизими бўйича иккинчи қатнов ҳам 12 январь куни соат 03:00 да Наманган аэропортидан Екатеринбургга амалга оширилади.
«Илгари барча аэропортлар миллий авиакомпаниянинг битта рўйхатдан ўтиш тизимидан фойдаланарди. Кейинчалик аэропортлар учун ўзларининг рўйхатга олиш тизимига эга бўлиш эҳтиёжи туғилди. Uzbekistan Airports Sirena Travel компаниясининг Astra DCS тизимини танлади.
Ўзбекистоннинг барча 11 та халқаро аэропорти, ўзининг рўйхатга олиш тизимига эга бўлмаган барча авиакомпаниялар ҳам ушбу тизимга босқичма-босқич ўтказилади. Astra DCS тизими график интерфейсга эга бўлиб, йўловчилар ва юкларни тез ва қулай тарзда рўйхатдан ўтказиш имконини беради», — дейди Uzbekistan Airports бошқаруви раисининг биринчи ўринбосари Жавлон Умархўжаев.
Хабарда таъкидланишича, ушбу ижрочи очиқ танлов тартиб-таомиллари натижалари асосида танланган. Sirena Travel компаниясининг Astra DCS — йўловчилар ва юкни рўйхатдан ўтказиш жараёнининг барча зарур операцияларини автоматик равишда бажарилишини таъминлайдиган замонавий кўп тилли хостинг тизим.
Изоҳ (0)