Suriyadagi jangarilar safiga qo‘shilmoqchi bo‘lgan o‘zbekistonlik erkak Rossiyada ushlandi

“Tavhid va jihod katibasi” terroristik guruhi tarafdori xorijda ushlandi, deb xabar bermoqda Davlat xavfsizlik xizmati.

Ma’lum qilinishicha, J.X. ismli erkak (1987-yil Surxondaryo viloyatida tug‘ilgan) 2016—2021-yillarda mehnat migranti sifatida Rossiyaning Krasnodar o‘lkasida ishlagan. U yerda ijtimoiy tarmoqlar orqali Suriyadagi “Tavhid va jihod katibasi” terroristik guruhi a’zolari bilan muloqotga kirishib, ularning ta’siriga tushib qolgan.

Oqibatda J.X. ekstremistik oqimlar va terroristik tashkilotlar g‘oyaviy rahnamolarining jihodga chorlovchi materiallarini o‘zining yaqin tanishlari orasida targ‘ib qila boshlagan.

Shuningdek, u jangarilar safiga qo‘shilish maqsadida Suriyaga ketmoqchi bo‘lgan vaqtida Davlat xavfsizlik xizmati va Rossiya huquq-tartibot idoralari hamkorligida ushlanib, O‘zbekistonga olib kelingan.

Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.