Toshkentning Shayxontohur tumanidagi “Gulobod” mahallasida otalar choyxonasi, savdo va xizmat ko‘rsatish obyektlari, shuningdek, sport maydonchalari quriladi. Bu haqda “Gazeta.uz” Toshkent shahar hokimi Jahongir Ortiqxo‘jayevning 10-yanvardagi qaroriga asoslanib, xabar bermoqda.
Hujjat prezident Shavkat Mirziyoyevning 2021-yil 23-noyabr kuni mahallaga tashrifi va aholi bilan uchrashuvi yakunlari bo‘yicha topshiriqlarning 2-bandini amalga oshirish doirasida qabul qilingan.
Loyiha buyurtmachisi — poytaxt hokimligi huzuridagi “Yagona buyurtmachi xizmati” injiniring kompaniyasi. Korxona rahbariga belgilangan tartibda loyihaning bosh loyihachisi va pudratchilarini aniqlash topshirildi.
Loyihani moliyalashtirish Toshkent shahar mahalliy budjeti hisobidan amalga oshirilishi rejalashtirilgan. Bu masala xalq deputatlari kengashi muhokamasiga kiritiladi.
Eslatib o‘tamiz, Shavkat Mirziyoyev 23-noyabr kuni Shayxontohur tumaniga tashrifi chog‘ida kutilmaganda “Gulobod” mahallasiga ham o‘tib, mavjud holatni ko‘zdan kechirgan va odamlar bilan suhbatlashgan.
“Yo‘l-yo‘lakay aholi bilan suhbatlashib, mahalliy sharoit bilan tanishdi. 93 yoshli Anvarxo‘ja ota prezidentni duo qildi. Mahalladagi o‘zgarishlarni ta’kidlab, otalar choyxonasi qurib berishni so‘radi. Shavkat Mirziyoyev bu taklifni qo‘llab-quvvatlab, otaxonga mustahkam sog‘lik tiladi”, — deyiladi matbuot xizmati xabarida.
Prezident matbuot kotibi Sherzod Asadov Shavkat Mirziyoyevning mahallada yashovchi fuqaro bilan suhbati aks etgan videoni ham e’lon qilgandi.
“O‘zim sizga chiroyli choyxona qurib beraman”, — degandi davlat rahbari.
Mavzuga doir:
- Shavkat Mirziyoyevning Toshkentdagi Shayxontohur tumanida joylashgan mahalla va muassasalarga tashrifi — suratlarda
- O‘zbekistonda ko‘p qavatli uylar oldidagi bo‘sh turgan yerlar obodonlashtirish sharti bilan aholiga doimiy foydalanish uchun ajratiladi
- Jahongir Ortiqxo‘jayev Qo‘yliq bozorini ko‘chirish zarurat ekanini aytgan Bektemir hokimini rag‘batlantirdi, o‘zini o‘zi mukofotlagan Sergeli hokimini esa jazoladi
Izoh (0)