O‘zbekistonda 2022-yilda umumiy quvvati 3600 MVt bo‘lgan 10 ta quyosh va shamol elektr stansiyasini qurish bo‘yicha bitimlar imzolanadi. Bu haqda Energetika vazirligi xabar qildi.
Qayd etilishicha, o‘tgan 3 yil ichida quyosh va shamol elektr stansiyalarini qurish bo‘yicha 10 ta bitim imzolangan. 2021-yilning avgust oyida Navoiy viloyatining Karmana tumanida birinchi 100 MVt quvvatli quyosh fotoelektr stansiyasi ishga tushirilgan.
Shu bilan birga, 2022-yil I choragida Samarqand viloyati Nurobod tumanida ikkinchi 100 MVt quvvatli yirik quyosh fotoelektr stansiyasini ishga tushirish rejalashtirilgan.
Buxoro, Namangan, Xorazm, Qashqadaryo, Farg‘ona va boshqa viloyatlarda umumiy quvvati 1900 MVt bo‘lgan 8 ta quyosh fotoelektr stansiyasini hamda Qoraqalpog‘istonda umumiy quvvati 1700 MVt bo‘lgan shamol elektr stansiyalarini qurish uchun loyiha bitimlari imzolanishi rejalashtirilgan.
Shuningdek, 2023-yilda Samarqand, Jizzax, Navoiy va Surxondaryo viloyatlarida umumiy quvvati 1097 MVt bo‘lgan 4 ta quyosh fotoelektr stansiyasi va Qoraqalpog‘iston, Buxoro (G‘ijduvon va Peshku) va Navoiy viloyatlarida umumiy quvvati 1600 MVt bo‘lgan 4 ta shamol elektr stansiyasi “yashil” energiya ishlab chiqarishni boshlaydi.
Izoh (0)