Qashqadaryo viloyati G‘uzor tumanida quvvati 300 megavattgacha bo‘lgan quyosh fotoelektr stansiyasining qurilish loyihasi doirasida mustaqil elektr energiya ishlab chiqaruvchilar uchun tender bosqichi boshlandi. Bu haqda Energetika vazirligi xabar qildi.
Ma’lum qilinishicha, loyiha O‘zbekiston hukumati tomonidan Osiyo taraqqiyot banki ko‘magida amalga oshirilayotgan umumiy quvvati 1 gegavatt bo‘lgan QFESlarni qurish dasturi doirasidagi ikkinchi loyiha hisoblanadi. Dastur O‘zbekiston Energetika vazirligi, Moliya vazirligi, Davlat-xususiy sheriklikni rivojlantirish agentligi hamda Investitsiyalar va tashqi savdo vazirligi tomonidan amalga oshirilmoqda.
Dastur qayta tiklanuvchi energiya manbalaridan foydalanishni rivojlantirish va 2030-yilga qadar mamlakatda elektr energiyasiga o‘sib borayotgan talabni qondirish uchun 7 GVtgacha quyosh energiyasini ishlab chiqarish bo‘yicha strategiyaning asosiy tarkibiy qismlaridan biri hisoblanadi.
Tanlov g‘olibi tomonidan stansiyani loyihalashtirish, moliyalashtirish, 25 yil davomida foydalanish va texnik xizmat ko‘rsatishni amalga oshirilishi kutilmoqda.
Loyiha doirasida investor loyiha yer maydoni yonida joylashgan 500 kilovatt kuchlanishli G‘uzor podstansiyasigacha elektr uzatish tarmog‘ini ham qurishi kerak bo‘ladi.
Loyiha OTB bilan yuqorida keltirilgan qo‘shma dastur doirasidagi birinchi loyiha — 457 MVt quvvatga ega Sherobod QFESni qurishda qo‘llanilgan xalqaro amaliyotga muvofiq amalga oshiriladi. Stansiya qurilishi xalqaro miqyosda tan olingan modelli davlat-xususiy sheriklik tamoyillari asosida, malakali xususiy investor — ishlab chiquvchini jalb etish va tanlash maqsadida amalga oshirilmoqda.
Arizalarni qabul qilish muddati 2022-yilning 30-mart kuni soat 18:00 ga qadar davom etadi.
Eslatib o‘tamiz, quyosh foto elektr stansiyasi 2025-yilda foydalanishga topshirilishi rejalashtirilgan.
Avvalroq O‘zbekistonda 3 ta quyosh elektr stansiyasini qurish uchun 15 ta xalqaro kompaniya qiziqish bildirgani, Xitoy kompaniyasi Farg‘onada 350 million dollarga quyosh fotoelektr stansiyasi qurishni rejalashtirayotgani, Qoraqalpog‘istonda 100 megavattli shamol elektr stansiyasini qurish bo‘yicha bitimlar imzolangani xabar qilingandi.
Izoh (0)