O‘zbekistonda 2021-yilda inflyatsiya darajasi 9,98 foizni tashkil etdi. Bu haqda Davlat statistika qo‘mitasiga tayanib Spot xabar qilmoqda.
Qayd etilishicha, Markaziy bank prognoz qilganidek, ko‘rsatkich 2017-yildan beri birinchi marta 10 foizdan oshmagan. Iste’mol narxlari indeksining o‘sishi Markaziy bank taxmin qilgan 10 foizga mos kelgan. Asosiy inflyatsiyaning sekinlashishi va monetar sharoitlarning o‘rtacha qattiqligi inflyatsiya maqsadiga erishishga yordam bergan.
2021-yilning dekabr oyida narxlar 1,26 foizga oshgan. Taqqoslash uchun, 2020-yilning dekabrida bu ko‘rsatkich 1,55 foizni, 2019-yilning dekabrida 1,69 foizni tashkil etgan edi.
Dekabr oyida oziq-ovqat mahsulotlari 2 foizga (o‘tgan yilning shu davrida — 2,4 foizga), nooziq-ovqat tovar narxlari noyabr oyidagi kabi 0,8 foizga o‘sdi (bir yil avval 0,9 foizni tashkil etgan).
Xizmat ko‘rsatish sohasida narxlar o‘rtacha 0,5 foizga oshgan (2020-yilda 0,9 foizni qayd etgan).
Spot’ning yozishicha, o‘nlab yillar davomida O‘zbekistonda inflyatsiya darajasi 3-5 foizni tashkil etgan, biroq ushbu raqamlar shubhali.
Statistika shaffof va obyektivroq bo'lgan 2017-yilda inflyatsiya 14,4 foizni tashkil etgan edi. 2018-yilda u 14,3 foizga, 2019-yilda 15,2 foizga yetgan. 2020-yilda avvalgi minimal ko‘rsatkich 11,1 foiz etib belgilangan edi.
Hukumat 2022-yilda inflyatsiyani 9 foizga, keyingi yillarda esa 5 foizga tushirish vazifasini qo‘ygan.
Mavzuga doir: Shavkat Mirziyoyev: “Inflyatsiya darajasini kelgusi ikki yilda 5 foizga tushirishni reja qilganmiz”
Izoh (0)