Samarqand va Namangan shaharlarini istiqbolda “millionlik shaharlar”ga aylantirish bo‘yicha choralar ko‘riladi. Bu haqda 2022—2026-yillarga mo‘ljallangan taraqqiyot strategiyasini 2022-yilda amalga oshirish bo‘yicha “Yo‘l xaritasi” loyihasida ko‘zda tutilgan.
Xususan, 2022-yilning martida Samarqand va Namangan shaharlarini “millionlik shaharlar”ga aylantirish bo‘yicha respublika ishchi guruhlari tashkil etiladi. Iyun oyida Samarqand va Namangan shaharlarining chegaralarini o‘zgartirish masalasi xalq deputatlari mahalliy kengashlarida ko‘rib chiqiladi. Avgust oyida Samarqand va Namangan shaharlari chegaralarini o‘zgartirish bo‘yicha Oliy Majlis Senati va Qonunchilik palatasi qarorlari ishlab chiqiladi.
Bundan tashqari, 2022-yilning martida Qashqadaryo viloyatining urbanizatsiya darajasini 50 foizga yetkazish rejalashtirilgan. Shu maqsadda Qashqadaryo viloyatida urbanizatsiya darajasini yanada yaxshilash bo‘yicha chora-tadbirlar ishlab chiqiladi.
Bunda:
- 12 ta shahar, 117 ta shaharcha va 1041 ta qishloq aholi punktlari inventarizatsiyadan o‘tkaziladi;
- 2 ta katta, 1 ta o‘rta va 9 ta shahar joylashuvlari tahlil qilinadi va iqtisodiy jihatdan bunday holat qanchalik iqtisodiy taraqqiyotga muvofiqligi o‘rganiladi;
- Qarshi shahri atrofidagi aholisi 5 500 kishidan ortiq bo‘lgan qishloq aholi punktlari (Qozikent, Uzunnavo, To‘qmang‘it) urbanizatsiya jarayonlari yanada jadallashtiriladi va ularni Qarshi shahriga qo‘shish muvofiqligi o‘rganiladi;
- Kitob shahri atrofidagi aholisi 4200 dan ziyod bo‘lgan qishloq aholi punktlarida (Minglar, Gulgunpo‘sht, Jarqo‘rg‘on) urbanizatsiya jarayonlari yanada jadallashtiriladi va ularga shahar maqomini berish bo‘yicha ishlar olib boriladi;
- aglomeratsiya va ichki migratsiya jarayonlarini hisobga olgan holda aholisi 1,43 milliondan ziyod bo‘lgan shahar aholi punktlarining ixchamligi va qulay joylashuvini ta’minlash bo‘yicha ishlar olib boriladi.
Bunda:
- BMT Xabitat dasturi, xorijiy davlatlar tajribasi va tegishli imzolangan xalqaro shartnomalar va memorandumlar ko‘zda tutiladi;
- hududlarning bosh rejalar bilan ta’minlangani, arxitekturaviy dizayn-kodlar mavjudligi va ularga rioya qilinishi, infratuzilma va bino-inshootlar fondi energosamaradorligi, hududlar ko‘kalamzorligi va obodonlashtirish darajasi, shaharlarning infratuzilma bilan ta’minlangani inobatga olingan holda obyektlar joylashtiriladi va loyihalashtiriladi;
- shaharlarni zonalarga bo‘lish orqali ichki hududlarni tegishli toifalarga ajratgan holda baholash maqsadida 6 ta zonaga (yashash joylari, yo‘l chizmalari, ko‘kalamzorlashtirish, ma’muriy, biznes infratuzilmasi, ijtimoiy infratuzilmalar, jamoat maydonlari) bo‘lish va ularni baholash ishlari amalga oshiriladi.
Viloyat hokimi dunyoda “millioner shahar”larning o‘z statusi borligini ta’kidlab, “Har qanday biznesmen biror tumanga pul qo‘yishdan oldin aholisi qanchaligiga qiziqadi. Mehnat resursi boymi, yo‘qmi, deb so‘raydi. Odam ko‘p bo‘lsa, bu yerga pul tikadi. Nega tikadi, chunki shaharda ko‘p odam bo‘lsa, ko‘p yeydi, ko‘p odam kirib-chiqadi. Shuning uchun ham millionli shaharning statusi o‘zgacha. Shuning uchun Samarqand shahri millionli shahar bo‘ladi”, — deb aytgandi.
Prezident Shavkat Mirziyoyev 2021-yilning aprelida Samarqand viloyatiga tashrifi doirasida Samarqand maydoni yaqin atrofdagi beshta tuman hududlarining bir qismi qo‘shilishi hisobiga amaldagi 12,4 ming gektardan 30,5 ming gektarga kengayishini bildirgan.
Izoh (0)