OIIB O‘zbekistonda pandemiya davrida tadbirkorlikni qo‘llab-quvvatlash uchun 200 mln dollar ajratdi

Osiyo infratuzilmaviy investitsiyalar banki O‘zbekistonga 200 million dollar ajratdi. Bu haqda Norma xabar qildi.

Ma’lum qilinishicha, Vazirlar Mahkamasining “Koronavirus pandemiyasi davrida tadbirkorlik subyektlarini qo‘llab-quvvatlash maqsadida Osiyo infratuzilmaviy investitsiyalar banki kredit liniyasini jalb qilish va undan foydalanish chora-tadbirlari to‘g‘risida”gi qarori qabul qilingan. Investitsiyalar va tashqi savdo vazirligi, Moliya vazirligi va TIF milliy banki tomonidan Osiyo infratuzilmaviy investitsiyalar bankining umumiy qiymati 200 million dollarga teng kredit liniyasini jalb qilish bo‘yicha dastlabki kelishuvlarga erishilgan.

OIIBning kredit liniyasi davlat kafolati ostida bir nechta transhlar asosida beriladi. Jumladan, har bitta transh 5 yil muddatga 2 yillik imtiyozli davr bilan, foiz stavkasi 6 oylik Libor plyus yillik 0,65 foiz, OIIBning 0,25 foiz boshlang‘ich bir martalik tashkiliy komissiyasi va yillik 0,25 foiz kredit liniyasining foydalanilmagan qismi uchun hisoblaniladigan majburiyat komissiyasi bilan jalb qilinadi.

Mablag‘lar koronavirus pandemiyasi oqibatlaridan jabrlangan korxonalarni qo‘llab-quvvatlash va o‘z faoliyatini tiklashga, ularni aylanma mablag‘lar bilan ta’minlash va ishlab chiqarish quvvatlarini oshirishga yo‘naltiriladi. Shu jumladan, ishlab chiqarish, qishloq xo‘jaligi, ulgurji va chakana savdo, umumiy ovqatlanish va transport sohalaridagi loyihalarni moliyalashtirish uchun foydalaniladi.

TIF milliy banki OIIB tomonidan ajratiladigan kredit liniyasi bo‘yicha qarz oluvchi va kredit mablag‘larining maqsadli va samarali foydalanilishi yuzasidan mas’ul ijro organi hisoblanadi. TIF milliy bankiga OIIBning jalb qilingan mablag‘larini qaytarish bilan bog‘liq xarajatlar, shu jumladan, foizlar, boshlang‘ich bir martalik tashkiliy komissiya va majburiyat komissiyasi haqlarini to‘lash va boshqa xarajatlar bo‘yicha to‘lovlar o‘z mablag‘lari hisobidan amalga oshirilishi tavsiya etilgan.

Eslatib o‘tamiz, 2020-yilning may oyida Osiyo infratuzilmaviy investitsiya banki O‘zbekistonda sog‘liqni saqlash tizimi va tadbirkorlikni qo‘llab-quvvatlashni rejalashtirayotgani xabar qilingandi. OIIB va Osiyo taraqqiyot banki hamkorligida O‘zbekistonning sog‘liqni saqlash tizimi va sanitariya-epidemiologiya xizmatini qo‘llab-quvvatlash uchun umumiy qiymati 200 million dollar bo‘lgan loyiha konsepsiyasi ishlab chiqilgandi.