Jismoniy imkoniyati cheklangan bo‘lishiga qaramay, ushbu aktyorlar kinematografiyada muvaffaqiyatga erishgan, chunki ular nogironlikni to‘siq emas, o‘ziga xoslik deb qabul qilgan hamda katta ekran orqali san’atda hech qanday cheklov yo‘qligini isbotlashgan.
Piter Dinkleyj
Piter Dinkleyjning bo‘yi tug‘ma axondroplaziya tufayli 135 santimetrni tashkil etadi. Oilada bu kasallik faqat Piterda kuzatilgan. U o‘z faoliyatini 26 yoshida boshlagan.
Dinkleyjga birinchi marta 2003-yilda “Vokzal nazoratchisi” dramasi ekranlarga chiqqandan so‘ng e’tibor qaratildi. Bu ish tomoshabinlarni Dinkleyjga ikkinchi darajali kulgili personaj sifatida emas, balki to‘laqonli dramatik aktyor sifatida qarashga undadi.
2011-yilga kelib, “Elf”, “Narniya yilnomalari: Shahzoda Kaspian” va boshqa ko‘plab filmlarda suratga tushishga ulgurgan taniqli aktyor edi.
Lekin unga haqiqiy mashhurlikni unga aynan “Taxtlar o‘yini” serialidagi roli keltirdi. Piter rolga kastingsiz taklif qilingan kam sonli aktyorlardan biri bo‘ldi. Jorj Martin Tirion Lannister personajini Piter maromiga yetkazib o‘ynay olishiga ishongan. Bu obraz uchun u “Emmi”, “Oltin globus” va “Sputnik” kabi ko‘plab mukofotlarga sazovor bo‘ldi.
Shuningdek, Dinkleyk “Sirana”, “Qasoskorlar: Abadiyat urushi”, “G‘aroyib odamlar”, “Ebbing, Missuri chegarasidagi uchta reklama taxtasi” kabi mashhur filmlarda ham suratda tushgan.
Jeymi Bryuer
Jeymi Bryuer Daun sindromi bilan tug‘ilgan, lekin aktrisa bo‘lish orzusidan voz kechmagan. U aktyorlik san’atini ixtisoslashgan kollejda va Los Anjelesdagi The Groundlings maktabida o‘rgandi. So‘ng “Amerika dahshatlari tarixi” serialida suratga tushdi va shu tariqa yirik filmda ishtirok etgan birinchi Daun sindromli aktrisa bo‘ldi.
2015-yilda esa Bryuer moda olamiga qadam bosdi va Nyu York moda haftaligida Carrie Hammer ko‘rgazmasida podiumga chiqqan birinchi Daun sindromli modelga aylandi. Jeymi nogironligi bo‘lgan insonlarga jamiyatning bugungi munosabatini o‘zgartirishni istaydi:
“Yosh qizlar menga qarab, hamma narsaning iloji borligini tushunishlarini istayman. Har bir inson o‘zligidek qolishga haqli”, degan edi u intervyularidan birida.
Karel Streyken
Gollandiyalik aktyor Karel Streykkenning bo‘yi 2,13 metr. Unga “gigantizm” tashxisi qo‘yilgan bo‘lsa ham, bolaligidan kino olamiga intilgan. Avval Amsterdamda kino maktabini, keyinroq Los Anjelesdagi Amerika kino institutini tugatgan. Gollivudda unga ko‘pincha sokin, sirli, haybatli qiyofali qahramonlar roli taklif etilgan.
Uning eng taniqli roli “Addamslar oilasi” filmidagi Larch ismli xizmatchi obrazi bo‘ldi. Aktyor ishtirokidagi “Tvin Piks”, “Yulduzli yo‘l: Kelajak avlod”, “Istvig jodugarlari”, “Doktor Son” va “Qora libosli odamlar” filmlar ham mashhur.
Streyken hozirda Los Anjelesda yashaydi. U oila qurgan va ikki nafar farzandi bor.
Jamel Debbuz
1990-yil yanvar oyida, Jamel 14 yosh bo‘lgan vaqtda temiryo‘l stansiyasida do‘sti Jan Pol bilan birga poyezd urib ketgan. Poyezd 150 km/soat tezlikda harakatlanayotgan bo‘lgan. Jan Pol halok bo‘lgan, Jamel esa og‘ir jarohat olib, o‘ng qo‘li butkul ishlamay qolgan va rivojlanishdan to‘xtagan. Do‘stining oilasi uni ayblagan bo‘lsa-da, rasmiy tergov Jamelning aybsizligini tasdiqlagan.
Mashhur fransuz aktyori har doim o‘ng qo‘lini cho‘ntagiga solib yuradi va bunga ko‘pchilikning e’tiborini tortmaydi. Ammo bunday jarohat unga buyuk aktyor va komik bo‘lishga xalal bermadi. U “Ameli”, “Asteriks va Obeliks: Kleopatra missiyasi”, “Anjel-A” kabi filmlardagi rollari bilan fransuz kinosining eng mashhur yulduziga aylandi.
Uorvik Devis
Kunlarning birida Uorvik Devisning buvisi “Yulduzlar jangi” filmining yangi qismi uchun 120 sm dan past bo‘yli aktyorlar izlayotgani haqida e’longa ko‘zi tushadi. Uorvikning bo‘yi esa o‘sha vaqtda atigi 107 sm edi. Shu tariqa, u o‘smir paytida afsonaviy filmda evuklar obrazida suratga tushdi. 1987-yilda esa “Uillou” filmida bosh rolni ijro etdi va eng mashhur mitti aktyorlardan biriga aylandi. Uorvik “Garri Potter”da professor Flitvik rolini ijro etgan. Shuningdek, “Leprekon”, “O‘ninchi qirollik”, “Doktor Kim” kabi loyihalarda suratga tushgan.
Izoh (0)