Jinoyat ishlari bo‘yicha Marhamat tuman sudi tomonidan onasi bilan tortishib, unga baqirgan ukasini pichoqlagan akaga nisbatan sud hukmi o‘qildi. Bu haqda Andijon viloyat sudi axborot xizmati “Daryo”ga ma’lum qildi.
Ma’lum bo‘lishicha, Marhamat tumanida yashovchi F.M.o‘ziga tegishli Matiz avtomobilida kirakashlik qilib kelgan. 2021-yilning 30-iyul kuni F.M. ertalab onasining tobi bo‘lmagani uchun uni shifokorga ko‘rsatib qaytib, ishga chiqib ketgan.
O‘sha kuni kechga yaqin ishdan uyga qaytgan o‘g‘il onasi, ukalari, turmush o‘rtog‘i va qizi bilan ko‘rishib, charchoq chiqarish va ovqatlanish maqsadida alohida xonaga kirgan hamda spirtli ichimlik iste’mol qilgan. Shu paytda ukasi Z. mast holatda onasi bilan tortishib ketganini eshitgan F.M. tashqariga chiqib, ularni tinchlantirishga uringan.
U onasining betobligi uchun aljirashda davom etgan ukasini qarshilik ko‘rsatishiga qaramasdan uyiga jo‘natib yuborgan. Shunday bo‘lsa-da, soat 22:00 larda Z. yana qaytib kelgan, baqir-chaqir qilgan. Onasi uydagi mol bilan ovunib yurganini aytishiga qaramasdan, molni sotib yuborishini bildirib, janjal ko‘targan va oynalarni sindirgan. Bundan g‘azablangan F.M.ukasi bilan yoqalashib, uni 3-4 qop bug‘doy turgan joyga itarib yuborgan. Muvozanatini yo‘qotgan Z. tik turgan pichoqqa yiqilgan. Pichoq uning chap qo‘ltiq tagiga kirgan.
Aka-ukani ajratgan yaqinlari Z.ni zudlik bilan shifoxonaga olib borgan, biroq ko‘p qon yo‘qotgan uka ko‘rsatilgan tibbiy yordamlarga qaramasdan, shifoxonada vafot etgan.
“Men atay qilmadim. Tanbeh berish maqsadida qo‘l ko‘tardi. Natijada ushbu baxtsiz hodisa yuz berdi. O‘zimga kelganimda uydagilar qo‘ng‘iroq qilishib, ukamning o‘tib qolganini, tayyorgarlik ko‘rib, uylarni tozalab qo‘yishimizni aytishdi. Turmush o‘rtog‘i bilan uylarni yig‘ishtirib, qon oqqan joylarni tozalab, pichoqni yuvib qo‘ydik. Men uni qasddan o‘ldirmadim. Shunday bo‘lsa-da ukamning o‘limiga sababchi bo‘lib qolganimdan afsusdaman. Onamdan, kelinim va jiyanlarimdan kechirishlarini so‘rayman”, — deydi sudlanuvchi.
Sud ishini ko‘rib chiqqan sudya fuqaro F.M.ni Jinoyat kodeksining 97-moddasi (qasddan odam o‘ldirish) 1-qismida nazarda tutilgan jinoyatni sodir etganlikda aybli deb topgan hamda unga nisbatan 10 yil muddatga ozodlikdan mahrum qilish jazosini tayinlagan.
Avvalroq Toshkent viloyatida uch taloq qo‘ygan xotinini do‘stiga nikohlab, ularni pichoqlagan erkakka hukm o‘qilgani, Qashqadaryoda o‘z ukasining oyoq-qo‘llarini sim bilan bog‘lab, tiriklayin yoqib yuborgan aka ushlangani, Qashqadaryoda homilador xotini, qaynanasi va ikki nafar bolani pichoqlab o‘ldirgan erkak umrbod qamoq jazosiga hukm qilingani to‘g‘risida xabar berilgandi.
Izoh (0)