Осиё инфратузилмавий инвестициялар банки Ўзбекистонга 200 миллион доллар ажратди. Бу ҳақда Norma хабар қилди.
Маълум қилинишича, Вазирлар Маҳкамасининг «Коронавирус пандемияси даврида тадбиркорлик субъектларини қўллаб-қувватлаш мақсадида Осиё инфратузилмавий инвестициялар банки кредит линиясини жалб қилиш ва ундан фойдаланиш чора-тадбирлари тўғрисида»ги қарори қабул қилинган. Инвестициялар ва ташқи савдо вазирлиги, Молия вазирлиги ва ТИФ миллий банки томонидан Осиё инфратузилмавий инвестициялар банкининг умумий қиймати 200 миллион долларга тенг кредит линиясини жалб қилиш бўйича дастлабки келишувларга эришилган.
ОИИБнинг кредит линияси давлат кафолати остида бир нечта траншлар асосида берилади. Жумладан, ҳар битта транш 5 йил муддатга 2 йиллик имтиёзли давр билан, фоиз ставкаси 6 ойлик Либор плюс йиллик 0,65 фоиз, ОИИБнинг 0,25 фоиз бошланғич бир марталик ташкилий комиссияси ва йиллик 0,25 фоиз кредит линиясининг фойдаланилмаган қисми учун ҳисобланиладиган мажбурият комиссияси билан жалб қилинади.
Маблағлар коронавирус пандемияси оқибатларидан жабрланган корхоналарни қўллаб-қувватлаш ва ўз фаолиятини тиклашга, уларни айланма маблағлар билан таъминлаш ва ишлаб чиқариш қувватларини оширишга йўналтирилади. Шу жумладан, ишлаб чиқариш, қишлоқ хўжалиги, улгуржи ва чакана савдо, умумий овқатланиш ва транспорт соҳаларидаги лойиҳаларни молиялаштириш учун фойдаланилади.
ТИФ миллий банки ОИИБ томонидан ажратиладиган кредит линияси бўйича қарз олувчи ва кредит маблағларининг мақсадли ва самарали фойдаланилиши юзасидан масъул ижро органи ҳисобланади. ТИФ миллий банкига ОИИБнинг жалб қилинган маблағларини қайтариш билан боғлиқ харажатлар, шу жумладан, фоизлар, бошланғич бир марталик ташкилий комиссия ва мажбурият комиссияси ҳақларини тўлаш ва бошқа харажатлар бўйича тўловлар ўз маблағлари ҳисобидан амалга оширилиши тавсия этилган.
Эслатиб ўтамиз, 2020 йилнинг май ойида Осиё инфратузилмавий инвестиция банки Ўзбекистонда соғлиқни сақлаш тизими ва тадбиркорликни қўллаб-қувватлашни режалаштираётгани хабар қилинганди. ОИИБ ва Осиё тараққиёт банки ҳамкорлигида Ўзбекистоннинг соғлиқни сақлаш тизими ва санитария-эпидемиология хизматини қўллаб-қувватлаш учун умумий қиймати 200 миллион доллар бўлган лойиҳа концепцияси ишлаб чиқилганди.
Изоҳ (0)