OTB Toshkent viloyatida oqava suvlar tizimini rivojlantirishga 161 mln dollar kredit ajratdi

Osiyo taraqqiyot banki Toshkent viloyatida oqava suvlarning integratsiyalashgan boshqaruv tizimini rivojlantirishga ko‘maklashish uchun 161 million  dollar miqdorida kredit ajratishni ma’qulladi. Bu haqda OTB axborot xizmatiga tayanib, Spot xabar berdi.

Ma’lum qilinishicha, loyiha doirasida Ohangaron, Olmaliq, Angren, Bekobod, Chirchiq, Yangiyo‘l va Chinozdagi markazlashgan oqava suv tizimlari modernizatsiya qilinadi. Loyiha doirasida tozalash inshootlari va kanalizatsiya tarmoqlarini qurish hamda rekonstruksiya qilish, 800 mingdan ortiq aholi uchun suv hisoblagichlarini o‘rnatish ishlari qo‘llab-quvvatlanadi.

Shuningdek, Chinoz, Yangiyo‘l va Zangiota tumanlaridagi 70 ta aholi punktida 136 ming aholiga septiklar o‘rnatilib, markazlashtirilmagan kanalizatsiya tizimidan foydalanishi ta’minlanadi.

“Ushbu loyiha suv va kanalizatsiya boshqaruvi uchun sun’iy intellekt, masofaviy datchiklar kabi raqamli texnologiyalarni o‘z ichiga olgan aqlli yechimlarni namoyish etadi”, — deydi OTBning shaharsozlik bo‘yicha katta mutaxassisi Chon Xo Kim.

Bundan tashqari, bank institutsional islohotlarni amalga oshirish uchun 800 ming dollar miqdorida texnik yordam granti ajratadi.

Eslatib o‘tamiz, avvalroq OTB O‘zbekistonda moliyaviy bozorlarni rivojlantirish uchun 100 million dollar ajratishi va STEM ta’limini rivojlantirishga 100 million dollar berishi xabar qilingandi.