29-dekabr kuni Turkmaniston prezidenti Gurbanguli Berdimuhamedov Ashxobodning “Alem” bog‘iga o‘rnatilgan Yangi yil bosh archasini borib ko‘rdi. Archa oldiga yig‘ilgan Ayaz Baba (Qorbobo), Garpamik (Qorqiz) va bolalar davlat rahbarini kirib kelayotgan 2022-yil bilan tabrikladi. Turkmaniston davlat axborot agentligi xabarida qayd etilishicha, kelayotgan yil mamlakatda “Arkadag‘li xalq davri” shiori ostida o‘tadi.
Xabarga ko‘ra, bog‘da Berdimuhamedov bolalarning chiqishlarini tomosha qilgan va archa atrofida raqs tushgan.
Keyinroq Savdo-sanoat palatasi binosida prezident Berdimuhamedovning farzandlari va nevaralari, hukumat a’zolari va amaldorlar, shuningdek, xorijiy diplomatlar uchun Yangi yil bazmi bo‘lib o‘tgan.
“Bazm ‘Hoş geldiň täze yyl Arkadagly diýara’ (“Xush kelibsiz, Arkadag davrining yangi yili”) qo‘shig‘i bilan umumbashariy bayram shodligi va birdamligining yuqori notasida yakunlandi”, — deb yozadi agentlik.
Televideniyeda namoyish etilgan ko‘rsatuvlarga qaraganda, Turkmaniston rahbarining o‘zi bazmda ishtirok etmagan.
Mavzuga doir:
- Gurbanguli Berdimuhamedov munajjimlar bashorati asosida 2022-yil uchun tavsiyalar berdi
- Gurbanguli Berdimuhamedov Betaraflik kuni sharafiga ziyofat uyushtirdi va unda mehmonlarga yangi yozgan she’rini o‘qib berdi
- Gurbanguli Berdimuhamedov amaldorlarga Turkmanistonda Betaraflik kuni va Yangi yil bayramini munosib tarzda o‘tkazishni buyurdi
Izoh (0)