Saudiya Arabistoni podshohi Salmon ibn Abdulaziz al-Soud Eronning yadroviy va ballistik raketa dasturlari bo‘yicha xalqaro hamjamiyat bilan to‘g‘ri hamkorlik qilmayotganidan xavotirda ekanini ma’lum qildi, deb xabar beradi “Interfaks”.
“Biz uning (Eronning — tahr.) yadroviy dasturlar va ballistik raketalarni ishlab chiqish bo‘yicha xalqaro hamjamiyat bilan hamkorlikni yo‘lga qo‘ymaganini xavotir ila kuzatib boryapmiz”, — deydi podshoh.
Uning so‘zlariga ko‘ra, shuningdek, xavotirga “Eron hukumatining mintaqaviy xavfsizlik va barqarorlikka putur yetkazuvchi siyosati, jumladan, mazhabiy qurolli tuzilmalarni yaratish va qo‘llab-quvvatlash hamda uning harbiy qudratini boshqa mamlakatlarda tarqalishi” ham sabab bo‘lmoqda. Podshoh Tehron o‘zining mintaqadagi “salbiy” xatti-harakatini o‘zgartirishiga hamda dialog va hamkorlikni tanlashiga umid bildirgan.
27-dekabr kuni Venada Eron va AQShning Yadro bo‘yicha qo‘shma harakatlar rejasidagi majburiyatlarga rioya qilishga qaytishi bo‘yicha muzokaralarning sakkizinchi raundi boshlandi. 28-dekabr kuni IRNA agentligi mazkur raund 30-dekabrga qadar davom etishini, shundan so‘ng, ishtirokchilar uch kunlik tanaffus olib, 2022-yilning 3-yanvaridan muzokaralarni qayta tiklashini ma’lum qildi. AQSh Davlat departamenti vakili Ned Prays shu kuni Amerika hukumati ushbu raund davomida erishilgan natijalarni ahamiyatli muvaffaqiyat deb hisoblamasligini aytgan edi.
Yadro bo‘yicha qo‘shma harakatlar rejasi deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashgan. 2018-yil may oyi boshida AQSh kelishuvdan bir tomonlama chiqishini e’lon qilgan va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etgandi.
Izoh (0)