Qashqadaryodagi choyxonada mast erkak hamqishlog‘ini pichoqlab o‘ldirdi

Qashqadaryo viloyati Koson tumanida 18-dekabr kuni mast erkak tanishini pichoqlab o‘ldirdi. Bu haqda viloyat Ichki ishlar boshqarmasi xabar qildi.

Ma’lum qilinishicha, shu kuni soat 21:45 atrofida tumanning “Quyi Obron” mahallasida yashovchi muqaddam sudlangan Y.A. hamqishlog‘i T.E. bilan qishloqdagi choyxonaga kelgan. Ovqatlanish jarayonida spirtli ichimlikdan mast fuqarolar o‘rtasida janjal yuzaga kelgan.

Oqibatda ular kuch sinashish maqsadida tashqariga chiqadi. Shu payt Y.A. kabob pishiriladigan qo‘ra yonidagi stol ustida turgan pichoqni olib, uni T.E.ning pastki jag‘iga tiqib oladi. T.E. olgan tan jarohati oqibatida vafot etadi.

Holat yuzasidan Y.A.ga nisbatan jinoyat ishi qo‘zg‘atilib, tergov harakatlari olib borilmoqda.