Jinoyat ishlari bo‘yicha O‘rta Chirchiq tuman sudida rashk tufayli ayoli va do‘stini pichoqlagan erkak ishi ko‘rildi. Bu haqda “Sevimli” telekanalining “Zamon” informatsion dasturida ma’lum qilindi.

Kadr: YouTube

Ma’lum qilinishicha, 3 nafar farzandning otasi bo‘lgan 30 yoshli fuqaro M.T. uyida do‘sti J.I. bilan spirtli ichimlik iste’mol qilgan va mast holatda unga turmush o‘rtog‘i R.ga uch yil avval taloq qo‘yib, javobini berganini aytgan. Keyinchalik er-xotin yana yarashib, ayoli bilan bir uyda yashab kelgan.

“Spirtli ichimlik ichganim sababli ayolim bilan oilaviy mojaro bo‘lib, urushib qoldim. Janjal ustida taloq qo‘yganim sababli oradan uch yil o‘tgach, bir domladan maslahat so‘radim. Domla ayolimni boshqa birovga nikohlab, u bilan uch kun yashagandan keyin va u ham taloq qo‘ygach, qayta nikohimga olib yashashim mumkinligini aytdi”, — deydi M.T.

Shundan so‘ng, u do‘sti J.I.ga o‘zining xotini R. bilan nikoh o‘qitishni, uch kun o‘tgach ayolni taloq qilishini, keyin esa o‘zi qaytadan nikohiga olishini taklif qilgan.

Do‘sti bunga rozi bo‘lgan. U ayolning xonasiga kirib ketganida, mast holatda bo‘lgan M.T.ning jahli chiqib, oshxona pichog‘i bilan yotoqxonaga bostirib kirgan. Ayolni urib, chap tomon ko‘krak sohasining orqa tomoni va chap yelkasiga pichoq urgan. Do‘sti J.I.ning esa qorin hamda chap bilan sohasiga pichoq sanchib, og‘ir tan jarohati yetkazgan.

Sud davomida ayblanuvchi M.T. e’lon qilingan ayblovga to‘liq iqrorligini bildirgan.

Sud hukmiga ko‘ra, Jinoyat kodeksining 104-modda (qasddan badanga og‘ir shikast yetkazish) 3-qismi “a” bandida nazarda tutilgan jinoyatni sodir etganlikda aybli deb topilgan va Jinoyat kodeksining 57-moddasini (yengilroq jazo tayinlash) qo‘llab, 4 yil muddatga ozodlikdan mahrum etish jazosi tayinlangan.

Avvalroq Farg‘onada xotini va 13 yoshli o‘g‘lini tayoq bilan urib o‘ldirgan erkak 22 yilga qamalgani, Buxoroda besh farzandli ayol eri tomonidan pichoqlab o‘ldirilgani, Jizzaxda xotinini xiyonat qilishda ayblab, uni o‘ldirib qo‘ygan shaxs 14 yilga qamalgani to‘g‘risida xabar berilgandi.