Jizzax shahrida bank xodimi o‘z mijozlarining plastik kartalaridagi pullarini o‘g‘irlash bilan shug‘ullanib kelgan shaxs aniqlandi, deb xabar beradi Jizzax viloyati IIB axborot xizmati.
Ma’lum qilinishicha, shaharning “Do‘stlik” mahalla fuqarolar yig‘inida istiqomat qiluvchi fuqaro ichki ishlar organlariga murojaat qilib, unga tegishli bank plastik kartasidan noma’lum shaxs 8 million so‘m pulini yechib olganini bildirgan.
Holat bo‘yicha jinoyat ishi qo‘zg‘atilib, olib borilgan tezkor qidiruv tadbirlari natijasida mazkur jinoyat jabrlanuvchi mijoz bo‘lgan bankning chakana xizmatlar bo‘limi boshlig‘i, Jizzax shahrining “Uchariq” mahallasida istiqomat qiluvchi shaxs tomonidan sodir etilgani aniqlangan.
Shuningdek, ayblanuvchi yana 10 nafar fuqaroning pulini o‘margan bo‘lib, jabrlanuvchilarga jami 133 million 629 ming so‘m zarar yetkazilgan. Holat yuzasidan tergov harakatlari olib borilmoqda.
Avvalroq Buxoroda og‘ir kasal ekanini aytib, fuqaro ishonchiga kirgan va uning plastik kartochkasidan salkam 1 mln so‘m yechib olgan qizga jinoyat ishi ochilgandi.
Izoh (0)