Qozog‘iston prezidenti Qosim-Jo‘mart To‘qayev “Qozog‘iston Respublikasining ayrim qonun hujjatlariga o‘lim jazosini bekor qilish bo‘yicha o‘zgartirish va qo‘shimchalar kiritish to‘g‘risida”gi qonunini imzoladi, deb yozadi “Zakon.kz”.
Qonunga muvofiq o‘lim jazosi jazo turi sifatida Qozog‘iston Jinoyat kodeksining umumiy qismidagi 11 ta moddadan, jumladan, jazo tizimi, jazoni tayinlash va almashtirish to‘g‘risidagi moddalardan chiqarib tashlandi. Bundan tashqari, o‘lim jazosi tushunchasi, shartlari va moratoriy talabining qo‘llanilishiga oid maxsus modda bekor qilindi, deyiladi Oqo‘rda bayonotida.
Mamlakatda o‘lim jazosi Jinoyat kodeksining 17 moddasi sanksiyasidan chiqarib tashlangan — eng og‘ir jazo umrbod qamoq jazosi bo‘lib qolmoqda. Jinoyat kodeksiga kiritilgan o‘zgartirishlarga ko‘ra, o‘lim jazosi umrbod ozodlikdan mahrum qilish bilan almashtirilgan shaxslarni shartli ravishda ozod etish taqiqlanadi.
13-oktabr kuni Qozog‘iston Majlisi o‘lim jazosi bilan jazolash bo‘yicha Jinoyat kodeksiga o‘zgartirish va qo‘shimchalar kiritish to‘g‘risidagi qonun loyihasini birinchi o‘qishda ma’qullagan edi. Tuzatishlar 13 ta moddadan o‘lim jazosini chiqarib tashlash va uni faqat harbiy xarakterdagi o‘ta og‘ir jinoyatlar uchun qoldirishni taklif qiladi.
Ammo mamlakat prezidenti Qosim-Jo‘mart To‘qayev parlamentga har qanday holatda ham o‘lim jazosini bekor qiladigan qonun tayyorlash taklifi bilan chiqdi.
Dekabr boshida Qozog‘iston parlamenti o‘lim jazosini butunlay bekor qilish haqidagi qonun loyihasini ma’qulladi. 23-dekabr kuni esa parlament Senatining yalpi majlisida deputatlar “Qozog‘iston Respublikasining ayrim qonun hujjatlariga o‘lim jazosini bekor qilish bo‘yicha o‘zgartish va qo‘shimchalar kiritish to‘g‘risida”gi qonunni qabul qildi.
Ma’lumot uchun, O‘zbekistonda o‘lim jazosi 2008-yil 1-yanvardan boshlab bekor qilingan.
Izoh (0)