Rossiya prezidenti Vladimir Putin Davlat Dumasiga Rossiya fuqaroligi to‘g‘risidagi federal qonun loyihasini taqdim etdi. Hujjatda, jumladan, fuqarolikdan mahrum qilishga sabab bo‘ladigan jinoyatlar ro‘yxatini kengaytirish nazarda tutiladi, deb yozmoqda Meduza.
Qonun loyihasida fuqarolikka qabul qilish to‘g‘risidagi qarorlarni bekor qilish o‘rniga fuqarolikni tugatish institutini joriy etish taklif qilinmoqda. Fuqarolikni tugatish uchun sabablar qatoriga — fuqaroning ixtiyoriy istagi hamda jinoyat sodir etish, unga tayyorgarlik ko‘rish yoki jinoyatga urinish kiradi. Ikkinchi holatda, gap xorijliklarga berilgan fuqarolikni bekor qilish haqida ketmoqda.
Qonun loyihasiga muvofiq, chet elliklarni Rossiya fuqaroligidan mahrum qiladigan jinoyatlar ro‘yxatini quyidagilar bilan kengaytirish taklif etiladi:
- davlatga qarshi og‘ir jinoyatlar — shu jumladan, ommaviy tartibsizliklarni tashkil etish (Rossiya Federatsiyasi Jinoyat kodeksining 212-moddasi 1-qismi), davlatga xiyonat (Jinoyat kodeksining 275-moddasi) va josuslik (Jinoyat kodeksining 276-moddasi);
- giyohvandlik vositalari va psixotrop moddalarning muomalasi sohasidagi jinoyatlar, shu jumladan, giyohvandlik vositalarini ko‘p miqdorda va o‘ta yirik hajmda qonunga xilof ravishda olish va saqlash (Jinoyat kodeksi 228-moddasi 2—3-qismlari), giyohvandlik vositalarini ishlab chiqarish yoki sotish (Jinoyat kodeksining 228.1-moddasi 3—5-qismlari).
Qonun loyihasida shuningdek, fuqarolikni soddalashtirilgan tarzda qabul qilish tartibini 20 dan ortiq toifadagi shaxslar bilan kengaytirish ko‘zda tutilgan. Xususan, gap vatandoshlar — sobiq SSSR fuqarolari va ularning farzandlari, shuningdek, yaqin qarindoshlari Rossiyada yashovchi va Rossiya fuqaroligiga ega bo‘lgan odamlar haqida bormoqda. Investorlar va malakali mutaxassislar ushbu ro‘yxatga kiritilmagan.
Rossiyaliklar bilan turmush qurgan chet elliklar, agar nikohda umumiy farzand bo‘lsa, fuqarolikni soddalashtirilgan tarzda olishga umid qilishi mumkin. Bu chora soxta nikohlarga qarshi kurash bilan izohlangan.
Avvalroq Putin politsiyachilarning vakolatini kengaytiruvchi qonunni imzolagan edi. Ularga fuqarolarning avtomobillarini tintuv qilishga ruxsat berilgan.
Izoh (0)