Meksikada bedarak yo‘qolganlar soni 95 ming kishini tashkil etmoqda. Hukumat odamlarni identifikatsiyalash markazi ochishni va’da qildi

Meksikada 95 ming kishi bedarak yo‘qolgani, 52 ming noma’lum jasad ommaviy qabrlarga ko‘milgani qayd etilgan. Bu haqda Deutsche Welle xabar berdi.

“Odamlarni identifikatsiyalash milliy markazining tashkil etilishi bu boradagi kamchiliklarni bartaraf etish, ommaviy identifikatsiya qilish mexanizmlarini yaratishga qaratilgan”, — deyiladi hukumat bayonotida.

Meksika ichki ishlar vazirining inson huquqlari bo‘yicha yordamchisi Alexandro Ensinas mamlakatdagi sovuq kameralarda 9400 ta noma’lum jasad borligini qo‘shimcha qildi.

“Sud-tibbiyot sohasida inqiroz mavjud, bu esa odamlarning shaxsini aniqlash va ularning oilalariga qaytishini kafolatlay olmaydigan vaziyatga olib keldi”, — dedi vazir.

Hisobotda Ensinas Meksika hukumati mamlakatda inson huquqlarining buzilishi davom etayotganini tan olishini ta’kidlab, hukumatning muvaffaqiyatsizliklari tufayli vaziyat yomonlashganini qo‘shimcha qildi. Vazir tomonidan e’lon qilingan chora-tadbirlar orasida Meksikani himoya qilish dasturining benefitsiarlari sonini 88 foizga ko‘paytirish ham bor.

Qayd etilishicha, ayni paytda Meksikada butun mamlakat bo‘ylab 2011 nafar huquq himoyachisi va 495 nafar jurnalistni himoya qilish tashabbusi amal qilmoqda. Mamlakat prezidenti Lopes Obrador lavozimga kelgan 2018-yilning dekabridan beri rasmiy ma’lumotlarga ko‘ra, Meksikada 96 nafar faol, 47 nafar jurnalist va OAV xodimlari o‘ldirilgan. Ensinasning so‘zlariga ko‘ra, jurnalistlarga qarshi jinoyatlarning 90 foizi jazosiz qolmoqda.