Теҳрон ва Бағдод Эрон генерали Сулаймоний ва Ироқнинг терроризмга қарши кураш бўйича юқори мартабали қўмондонларининг ўлдирилишида айбдорларни жиноий жавобгарликка тортиш юзасидан қўшма баёнотни имзолади. Бу ҳақда Эрон суд тизимининг юқори мартабали мулозимига таяниб, Iran.ru хабар берди.
Эрон суд тизими Инсон ҳуқуқлари кенгаши котиби ва судьянинг халқаро ишлар бўйича ўринбосари Козим Ғарибободийнинг айтишича, 23 декабрь куни Эрон ва Ироқ терроризмга қарши кураш етакчилари генерал-лейтенант Қосим Сулаймоний ва ироқлик Абу Маҳди ал-Муҳандиснинг ўлдирилишини тергов қилиш учун тузилган қўшма қўмитанинг иккинчи йиғилишида қўшма баёнотни имзолаган.
Ғарибободий 21 декабрь куни Теҳронда бўлиб турган Ироқ адлия вазири Салар Абдул Саттор Муҳаммад билан учрашган.
У шунингдек, Эрон ва Ироқ иккала томон 2020 йилнинг бошида Бағдод аэропорти яқинида генерал Сулаймонийнинг ўлдирилиши бўйича АҚШнинг жиноий ҳаракати билан боғлиқ тергов ҳужжатлари ва ҳар қандай маълумот алмашишни давом эттиришга келишиб олганини айтди.
Хабар қилинишича, Эрон расмий вакили Теҳронга келган Ироқ адлия делегацияси билан учрашув чоғида генерал Сулаймоний ва Ироқнинг терроризмга қарши кураш бўйича юқори мартабали қўмондонларининг ўлдирилишида айбдорларни аниқлаш ва жиноий жавобгарликка тортиш зарурлигини таъкидлаган.
Эслатиб ўтамиз, Эрон Ислом инқилоби муҳофизлари корпуси (ИИМК) генерали Қосим Сулаймоний 2020 йил 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШнинг ўша пайтдаги президенти Дональд Трамп фармойишига асосан берилган.
Трамп ИИМКни террорчилик ташкилоти деб ҳисоблаган ва Қосим Сулаймонийни минтақада, хусусан, Ироқда бўлиб турган америкалик дипломатлар ва ҳарбийларга ҳужум қилишни режалаштирганликда айблаган. Эрон эса унга жавобан Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланганди.
Эрон Сулаймонийнинг ўлими учун АҚШдан қасос олиш ҳали якунланмаганини эслатиб ўтгани ҳақида хабар берилган эди. «Ал-Қудс» командири ўринбосари генерал Муҳаммад Ҳижозий «Бу шунчаки юзга тарсаки тортишдек гап эди, ҳақиқий қасос ҳали олдинда», деб айтган.
Изоҳ (0)