Egey dengizidagi Paros oroli yaqinida ichida migrantlar bo‘lgan qayiq ag‘darilib ketdi. Fojia oqibatida kamida 13 kishi halok bo‘lgan. Bu haqda The Guardian’ga tayanib, “Korrespondent.net” xabar berdi.
Ta’kidlanishicha, ko‘ngilsiz hodisa Paros orolidan sakkiz kilometr narida sodir bo‘lgan. Sohil xavfsizlik xizmati ma’lumotlariga ko‘ra, yelkanli kemadan 62 kishi qutqarib olingan.
Omon qolganlarning aytishicha, qayiqda jami 80 ga yaqin odam bo‘lgan. Ayni vaqtda qayiq ag‘darilgan joyda qidiruv operatsiyalari g‘avvoslar, beshta sohil xavfsizligi katerlari, o‘nta xususiy kema, vertolyot va harbiy-transport samolyoti ishtirokida davom etmoqda.
Qayiqning ag‘darilib ketishiga nima sabab bo‘lgani noma’lum. Bu Gretsiya suvlarida migrantlar bo‘lgan qayiqlarning joriy hafta o‘zida uchinchi marta ag‘darilib ketishidir.
23-dekabr kuni Afinadan 235 kilometr janubda yelkanli kema toshli orolchaga urilishi oqibatida 11 kishi halok bo‘lgandi. Yana 52 yo‘lovchi, jumladan 11 nafar ayol va 27 nafar bola “orolda bir necha soat qolib ketganidan so‘ng” qutqarib olingan.
24-dekabr kuni iroqlik migrantlar bo‘lgan kema Folegandros oroli yaqinida cho‘kib ketishi oqibatida kamida uch kishi halok bo‘lgan, yana 13 kishi qutqarib olingan. Kamida 17 kishi bedarak yo‘qolgani aytilmoqda.
Gretsiya Afrika, Yaqin Sharq va boshqa mamlakatlar migrantlari hamda qochoqlari uchun Yevropa Ittifoqiga kirishning eng asosiy yo‘li hisoblanadi.
Avvalroq Liviya sohillari yaqinida 75 dan ortiq muhojir cho‘kib ketgani, Fransiyada qochoqlar La-Mansh orqali Britaniyaga suzib o‘tishga urinayotgani uchun sport do‘konlarida qayiq sotish to‘xtatilgani to‘g‘risida xabar berilgandi.
Izoh (0)