Rossiya prezident ishlari boshqarmasi Vladimir Putinning 23-dekabr kuni Manejda bo‘lib o‘tgan yirik matbuot anjumanini tashkillashtirish uchun 117 million rubl (1,5 mln dollar), jumladan, jurnalistlarni kumush kukuni bilan dezinfeksiya qilishga qariyb bir yarim million rubl (19 ming dollar) sarflagan. Bu haqda davlat xaridlari materiallariga tayanib, Daily Storm xabar berdi.
Qayd etilishicha, prezident boshqarmasi “Kumush niqob” savdo belgisining DEZ GATE seriyali (DG-7.2 modeli) oltita dezinfeksiya kabinasini ikki kunlik ijaraga olish uchun 1 million 399 ming rubl sarflagan. Kumush zarralari bilan dezinfeksiya qilish uchun “Akvivon-Eko” vositasidan foydalanilgan.
Ishlab chiqaruvchi “Steril” kompaniyasining veb-saytida aytilishicha, dezinfeksiya kabinalari “inson terisi, kiyim-kechak, poyabzal va boshqa narsalarni samarali tozalash uchun mo‘ljallangan”. Kompaniyada ta’kidlanishicha, “samaradorlik va xavfsizlik ‘Rospotrebnadzor’ tomonidan tasdiqlangan”.
“Akvivon-Eko” vositasining qo‘llashdan oldingi yo‘riqnomasida uning “kumush kationlari konsentrati asosida” yaratilgani va “ekologik jihatdan toza, zaharli bo‘lmagan hamda insonlar uchun zararsiz ekani aytiladi”.
Prezident ishlari boshqarmasining matbuot kotibi Yelena Krilova Putinning matbuot anjumani oldidan kumush kukuni bilan dezinfeksiya qilish “mutlaqo xavfsiz” va “hatto foydali” ekanini ma’lum qilgan.
Meduza’ning tibbiyot bo‘yicha muharriri Daria Sarkisyan Manejdagi mazkur shakldagi dezinfeksiya haqida fikr bildirar ekan, tibbiyot yoki sog‘liqni saqlash tashkilotlarining kumushdan bunday usulda dezinfeksiya uchun foydalanishni taklif qiluvchi birorta rasmiy tavsiyasi yo‘qligini aytgan.
Vladimir Putinning katta matbuot anjumanidan tashqari, DEZ GATE seriyali kabinalar Reutov shahri ma’muriyatida, Rossiya Federatsiyasi Tashqi ishlar vazirligi huzuridagi Diplomatik akademiyada, shuningdek, Sankt-Peterburgning Nevskiy tumani shahar poliklinikasida ishlatilgan.
Izoh (0)