Farg‘ona viloyati O‘zbekiston tumanida 19-dekabr kuni o‘smir o‘zganing mashinasini o‘g‘irlab ketdi. Bu haqda Tergov departamenti xabar qilmoqda.
Ma’lum qilinishicha, shu kuni soat 08:30 atrofida Ichki ishlar organiga tumanning Bunyodkor ko‘chasida yashovchi T.D. (1988-yilda tug‘ilgan) qo‘ng‘iroq qilgan. U o‘zining “Moskvich” mashinasini yashash xonadoni oldida noma’lum shaxs olib qochgani haqida xabar berib, transportni topish va qonunbuzarga qonuniy chora ko‘rishni so‘ragan.
Olib borilgan tergovga qadar tekshiruv harakatlari natijasida jinoyatni voyaga yetmagan K.M. (2004-yilda tug‘ilgan) sodir etgani aniqlangan. U avtomashinani 3 kilometr masofagacha boshqarib borib, Dashthasan ko‘chasida joylashgan “Vahobjon ota” choyxonasi yoniga tashlab ketgan.
Qonunbuzar bilan bir qator tergov harakatlari o‘tkazilganda u shu kuni spirtli ichimlik iste’mol qilgani aniqlangan. O‘smir avtomashinani ochiqligidan foydalanib, kalit tanlash yo‘li bilan o‘t oldirgan va olib qochib ketgan.
Holat yuzasidan K.M.ga nisbatan Jinoyat kodeksining 267-moddasi 2-qismi “a” bandi (transport vositasini olib qochish; takroran yoki xavfli retsidivist tomonidan) bilan jinoyat ishi qo‘zg‘atilib, protsessual tartibda ushlangan. Hozirda tergov harakatlari davom etmoqda.
Jinoyat kodeksiga ko‘ra, mazkur jinoyatni sodir etgan shaxs o‘n yildan o‘n besh yilgacha ozodlikdan mahrum qilish bilan jazolanadi.
Izoh (0)